Trongtrai chungchanga thucha
2
1 Ka hung inchà nuom hmasa tak chê chu thil hnîna hai, trongtraina hai, hnipêkna hai le lawmthu hrilna hai chu mi po po ta dingin nei unla, 2 Pathien ngaisak a, thienghlim taka um a, muong taka ei khawsak diel diel theina dingin lalhai le rorêltuhai ta dingin hnipêk bok ro; 3 chu chu a thra a, ei Sandamtu Pathien lawmzawng a nih. 4 Ama chun mi po po sandama um a, thutak an hung hriet chu a dit si a. 5 Pathien pakhat chauh a um a, Pathien le mihriem inkărah palai pakhat chauh a um bok, mihriem Isu Krista chu. 6 Mi po po intlannain ama chu a hung inpêk a, sandamna thu chu hun a ti takah a hung puong tah a. 7 Kei hi Jentelhai laia chu ringna thu chu puong ding le thutak zirtirtu le tirko ni dinga ruot ka nih. Chu chu thudik a na, khêl ka hril nawh.8 Chuongchun, in inkhawmna taphotah pasalhai chun titak zetin, lungsen le insêl puma thaw loin, an kut thienghlim pharin trongtrai raw hai se. 9 Nuhmeihai khom a mawi tâwk le inchâwi tâwkin inchei hai sien la, sam siem lĕr hai, rangkachak thuoma inchei hai, tuikeplung thri hli hai, puon man tam inbel hai chîng naw raw hai se. 10 Nuhmei, Pathien ngaisak mihai thaw dan âwm hrimin, thilthaw thratin inthuom lem raw hai se.
11 Nuhmei chun to inchuin, thu awi takin thil inchûk raw se. 12 Nuhmeiin mi a zirtir amanih le pasal chunga thu a nei amanih ka phal nawh; to an inchŭ ding a nih. 13 Adam chu siem hmasak a ni a, chu zoah Evi siem a nih. 14 Hlĕma um kha Adam a ni nawh; nuhmei kha a nih hlĕma um le bawsetu lem chu. 15 Amiruokchu ringnaa dâm, hmangainaa dâm le thienghlimnaa dâm mawi taka a um zing phot chun nau a nei leiin nuhmei chu sandam ning a tih.a