1 TIMOTHE
Chibai bûkna
1
1 Kei Paula, a mi sandamtu Pathien le ei beisei innghatna Isu Krista thupĕk anga Krista Isu tirko hin, 2 ringnaa ka naupa indik tak Timothe, chibai ka bûk che. Pa Pathien le Isu Krista ei Lalpaa inthoka lunginsietna dam, zangaina dam le inremna dam i kuomah um raw se.Zirtirna indik naw laka fimkhur
3 Makedonia rama ka fe ding laia ka ngĕn chê ang khan Efesi khuoa um zing dingin ka ngĕn nawk chê a nih, thuring indik naw inchûktir hlak mi threnkhathai kha i khap theina ding le 4 pipu thusim le thlatuhai trobul sui rak rak kha bansan dinga i hril theina dingin; chuong thilhai chun ringnaa inthoka Pathien thiltum hrietna intlun nêkin zêldin thua insêlna a suktam mei mei a nih. 5 Hi ka thupêk thiltum chu lungril thienghlim, sie le thra hrietna indik le ringna tak taka inthoka suok hmangaina nei a nih. 6 Mi threnkhat chu, chu taka inthok chun an pĕt hmang a, hmangna bo insêlna tieng an lŭt a. 7 Dan zirtirtu ni nuom bok siin, an thu hril umzie le indik anga ngam taka an hrilhai khom chu an hriet tak tak bok si nawh.
8 Dàn hi a hmangna ding taka hmang chun a thra ti ei hriet. 9 Dan hi mi thrahai chunga hmang dinga siem ni loin dan bawsetu le mi hel hai, sakhuo poisa lo le thil suol thawtu hai, mani nu le pa thattu le tuolthat hai, 10 uire le mongkawhur hai, mihriema sumdawng mi le khêla inkhâm hmang hai le 11 Pathienin puong dinga a mi’n koltir Chanchin Thra ropui kala zirtir chîng mihai chunga hmang dinga siem a nih.
Lunginsietna leia lawmthu
12 Mi sukhrâttu, ring tlâka mi ngâia a rongbawlna sin thaw dinga mi ruottu Krista Isu, ei Lalpa kuomah lawmthu ka hril hlak. 13 Kha hma khan a hrilsetu, sukdŭdătu le râwng taka soisatu lo ni lang khom, ringtu ka ni hmaa hre loa thaw hlak ka ni leiin ka chungah zà a ngai a, 14 ei Lalpa lunginsietna chu Krista Isu-a ringna le hmangaina leh ka chungah a vŭr ta treuh lem a nih.
15 Krista Isu chu mi suolhai sandam dingin khawvelah a hung ti hi indikin pom tlâk a lo va ni de aw! Chuong lai chun kei hi a suol lor lak ka nih. 16 Nisienlakhom, chu lei tak chun, ama ringtuhai chungah Krista Isun dawtheina tawp lo a neizie le chatuon hringna a pĕk dingzie inentirna dingin kei mi suol tak chungah hin zàngaina a lo inlangtir a nih. 17 Laltak, chatuon mi, thi thei lo, mita hmu thei lo, Pathien pakhat chauh kuoma chun chawimawina le ropuina chatuon chatuonin um raw se. Amen.
18 Ka naupa Timothe, hieng thupekhai hi ka’n koltir che: zawlneihaiin i chungchang an hril lawk kha hre zing la, chuong thu chu zuiin indona thra chu bei la, 19 ringna le sie le thra hrietna fîm tak vong tlat rawh; mi threnkhatin an sie le thra hrietna an poisa naw leiin an ringna long a koi dar tah a nih. 20 Chuonghai lai chun Humenai le Aleksandra khom an thrang ve a, Pathien poi hril an simna dingin thunun an ngai a, Setan kutah ka pêk suok tawl tah a nih.