1 TIMOTHE
Thuhma
Timothe kuoma Tirko Paula lekhathon pakhatna hi Baibul pumpuia bu 54-na, bung 6 le chang 113 a sei a nih. A ziek hun hi hriet chieng a ni naw a, lekha hrang hranga inthoka lak khawm a ni el thei. Lung ina inthoka a ziek ni dingin a’n lang. Paula chun suok a’n beisei ta naw a, a hun tawp a tlung hnai tah ti a ring leiin Lalpa beramhai enkol le chawm lien dan ding thucha poimaw a tihai chu Timothe le Tita kuomah a ziek a. Chuleiin, Timothe 1&2 le Tita lekhathonhai hi pastor puol ta ding bika ziek lekhathon an ti hrim a nih.
Timothe hi a pa Grik mi, a nu Juda mi a ni a, Asia rama ringtu hmasa pawl, Paulan rongbawla a thruoihai laia tlangval fel tak a nih. Paula inzin hmasa tak truma Lustra khuoa a thuhril ngaithla a, a thilmak thawhai, mipuiin lungin an dĕng a, thi dêr tah anga kul puo tieng an pei suok a, a tûka a hung hring nawk hmutu le a thuhril ringtuhai laia mi chu Timothe le a nu Euniki an nih. Paula leh rongbawlnaah an inthlop nasa hle a. Timothe 1&2 Paulan a ziek lai hin Timothe chu Efesi kohrana pastor a nih.
Hi lekhaa hin Paulan a ngai poimaw thil pathum a ziek: (1) Kohrana inzirtirna indik lo laka fimkhur a trûlzie. Hieng hun lai hin Judahai le hnam dang zirtirna inchokpol mak tak tak a’n dar nasa hle a. Hi khawvel hmu thei hi suol hlawm a na, chuleiin sandam ni theina dingin thu ril hriet ding a um a, chu chu hriet ngei ding a nih ti dam, fak ding threnkhat lakah insûm a, nuhmei pasal khom innei lo ding a nih ti thu dam chu an thu inchuktir tlangpui a nih. (2) Kohran invong dan le inop dan ding hai, Kohran thruoitu ding chu mi ieng ang am an ni ding tihai, chawibiek inkhawma inhmang dan ding hai. (3) Isu Krista bawi thra ni dan ding. A thupui chabi chu “Pathien sungkuo, Pathien hring kohran, thutak kengkawtuhai chu, ieng anga um ding am an na ti i hriet theina dingin ka hung ziek a nih” (3:15) ti hi a nih.
A sung thu tlangpui
Thuhma (1:1-2)
Kohran le a thruoituhai thu (1:3-3:16)
Timothe sin làk dan ding (4:1-6:21)