Trongtraipĕk dinga ngĕnna
3
1 A tawp taka chun unauhai, Lalpa thu chu nangni lai ropui tak le hrât taka a hung indar pei theina ding le 2 mi indik naw le mi suolhai laka kan him theina dingin mi trongtraipui ro, a ring naw an la um si a. 3 Lalpa ruok chu a ringum a, ama chun sukhrâtin mi suol lakah veng him raw se chêu. 4 Thu kan pĕk chêu kha in thaw a, in thaw zom pei khom Lalpaa chun kan ring tlat a nih. 5 Pathien hmangaina hre nawk zuol pei ding le Krista tuorselna nei dingin Lalpan in lungril thruoi raw se.Thabo lo dinga infuina
6 Unauhai, kan kuoma inthoka thurosie in dong anga um loa zomthawa taka khawsa mei mei hai laka inthok chun inthier fihlîm dingin ei Lalpa Isu Krista hmingin kan hril chêu a nih. 7 Kan thaw dan inchûk ding in nih ti nangni ngeiin in hriet a, nangni lai dăwngda takin kan um ngai naw kha. 8 Tu bû khom a thlăwnin kan fak ngai naw a, nangni lai tu khom kan sukrik nawna dingin sŭn le zăn inrim takin sin kan thaw hlak a ni kha. 9 In mi somdawl kan phŭt thei naw lei a ni naw a, in mi enton dingin kan thaw lem hlak a ni kha. 10 In kuoma kan um lai khan, “Sin thaw pei naw chun a făk khom fa naw raw se” tiin kan hril hlak chêu kha. 11 Nangni laia threnkhat in zomthaw a, mani sin thaw si loa mi sinthawnaah inrol inchǐng ti kan lo hriet a nih. 12 Chuong ang mihai chu sin thaw mol mol a, mani thaw suok ngei ring dingin Lalpa Isu Krista hminga thu pein kan infŭi a nih.
13 Unauhai, nangni ruok chun thil thra thaw nghok ngai naw ro. 14 Tu khom hi lekhathona kan thu hung hril zawm nuom nawtuhai chu inchik bîk unla, pâwl ser ro, an inzà theina ding chêuin. 15 Amiruokchu, hmêlma ang chun ngai naw unla, unau angin zil lem ro.
Malsawmna
16 Remna Lalpa ngei chun kumkhuoin kong tinrêngah inremna pe sien la chêu, Lalpa chu in rênga kuomah um raw se.