Danbawsepa
2
1 Unauhai, ei Lalpa Isu Krista hung nawkna ding le a kuoma ei intuokkhawmna ding thua chun, 2 keinin thlaraua kan hril ni âwm tak anga an hril săwng le kan lekhathona kan ziek ni âwm taka an hrilhai thrangsana hmanga, “Lalpa ni chu a hung tlung zing tah” ti thu an hril thang hin in lungril sukchăng lo le sukthlaphâng lo dingin ka ngĕn chêu. 3 Tu khomin ieng konga khom thruoi hmang naw raw se chêu. Sukbohmanga um ding Danbawsepa chu hung a, helna a siem hmâ khat chun chu Ni chu hung tlung naw nih. 4 Ama chun, ‘pathien’ tia an ko le biek taphothai chu doin an chungah um tum a ta, Pathien Tempula meuh inthrungin Pathienah insâl a tih.5 In kuoma ka um lai khan hieng thil hi ka hril tah hlak chêu kha in hriet zing am? 6 A hun takah a hung inlang theina dingin tu hin iengin am a dang hri ti in hriet. 7 Danbawsepa chun tu khom hin a rûkin sin a thaw zing a, sienkhom a dangtu chu lăk hmang a ni hmâ khat chun la dang hri’ng a tih. 8 A hung inlang pha leh Lalpa Isu chun a thuokin mût hlum a ta, a hung nawkna ropui taka chun sukbohmang a tih. 9 Danbawsepa chu Setan hrătna leh hung a ta, a thilthawtheina tinrêngin thilmak le inchikna tehlĕm thaw’ng a tih. 10 Bohmang dinghai chu suolna tinrênga hlĕmin um an ta, sandama an um theina ding thutak chu dit loa an hnăwl leiin bohmang an tih. 11 Hieng lei hin, khêl an ring theina dingin Pathienin ngai suolna hri nasa takin a’n lêngtir a nih. 12 Thutak ring loa rîtlona lawm lemtuhai po po chun thiem naw an chang vong ding a nih.
Sandam dinga thlang
13 Unau, Lalpa dittakhai, a tira inthoka Pathienin Thlaraua sukthienghlim a, thutak ring ding le ra hmasa ni dinga a thlang chêu leiin Pathien kuomah lawmthu hril rop ding kan ni hrim a nih. 14 Chu chu ni ding le ei Lalpa Isu Krista ropuina chu chang dingin kan Chanchin Thra hril hmangin a ko chêu a ni kha.
15 Unauhai, ngîr nghet unla, kan thuhril le lekhathona zirtirna kan inhlàn sawng po po chêu kha pom tlat ro. 16 Ei Lalpa Isu Krista ngei le Pathien ei Pa, mi hmangaitu, a lunginsietna leia kumkhaw thlamuongna le beiseina thra mi petu chun, 17 thil thra tinrêng in thawna le hrilna taphotah chokphûrin sukhrât pei chêu raw se.