1 THESALONIKA
Thuhma
Thesalonika mihai kuoma Tirko Paula lekhathon pakhatna hi Baibul pumpuia bu 52-na, bung 5 le châng 89 a sei, A.D 51-45 vêla a ziek a nih.
Thesalonika khuo hi Makedonia rama Rom sorkar hmunpui a nih. Paula inzin voi hninaah Sila le Timothe thruoiin Filipi khuoa inthokin Thesolonikaah a fe a. Jentelhai lai Juda sakhuo ngaiven an tam hle a, chuonghai lai chun thu a hril a, Chawlni voi thum a chăm sŭngin kohran a’n din hman chauh khom ni loin an ringna a suknghet hman a. Chu taka Juda umhai chun an thǐk a, thrang lain an tai suok a, Beroi khuo tieng a’n saseng a, chu zoah Athen-ah fein Korinth khuo a hung tlung a. Athen khuoa inthokin Thesalonikaa ringtharhai chu ngaiven ding le an ringna sukhrât le suknghet dingin Timothe a tir a. An inthrang thratzie Timothea inthoka thu a lo hrietin a lawm ĕm êm a.
Chun, Isu hung nawkna ding thuah ringtharhai lai ngaidan indik lo a lût ti Timothe chun a hung ripawt bok a. Pakhat chu, an sung le kuo le laina lo thi tahai chu ropui taka Lalpa hung nawk phaa rapchara an thrang ve phak naw ding chu an lungkhampui a. Pahnina, Krista hung nawkna ding ngot tŭng le buoipuia sinthaw khom ngaisak mumal ta lo an um bok a. Chuong ngaidan indik lo chu thriek ding le an ringna sukhrât le suknghet dingin hi lekha hi Korinth khuoa inthoka a ziek a nih.
An ringna lei le hmangaina an hau lei chun a’n pâk a, an kuoma a um laia a khawsak danhai a hrilfie a. Krista hung nawkna thu chu hrilfiein, hung el dinga beisei zing puma mani sin ding seng ringum taka thaw mol mol dingin a’n fŭi tawl a nih.
A sung thu tlangpui
Thuhma (1:1)
Lawmthu le inpâkna (1:2-3:13)
Kristien khawsaka khawsa dinga infuina (4:1-12)
Krista hung nawkna ding thu inchuktirna (4:13-5:11)
Infŭina (5:12-22)
Tlangkawmna (5:22-28)