3 Unauhai, ringna tieng le inhmangai tuona tienga in inthranglien pei leiin Pathien kuomah lawmthu kan hril hlak a, chu chu kan thaw ding tak hrim a nih. 4 Suknomnatnahai le fienahai sel tak le ringna nghet taka in tuorhai hi Pathien kohranhai hmaah kan uongpui hlè hlak. 5 Pathien ram leia tuor in ni a, chu taka lût tlăk ni dinga Pathien thil rêl hang indikzie sukchiengna chu in nih. 6 Pathien chu a’n dik a, nangni sukrinumtu chĕu chu rinumnain thungrul ve’ng a tih. 7 Lalpa Isu chu vana inthoka ama vantirko thilthawthei takhai leh meichoka a hung inlang huna chun, nangni rinum tuorhai hi hung inchăwltir a ti chêu a, keini khom mi’n chăwltir bok a tih. 8 Pathien hre lo le ei Lalpa Isu Chanchin Thra ring nuom nawhai chungah phuba hung la’ng a tih. 9 Kumkhaw sietnaah chun pei hawn ni’ng an ta, Lalpa le a thuneina ropui tak hmaah khăr khipin um an tih. 10 Chu ni chu a mi thienghlimhaiin ama an chawimawi ni ding le ama ringtuhaiin mak ropui an ti ni ding chu a nih. Nangni khom in kuoma kan thu hril in lo pom leiin ringtuhai lai chun thrang ve’ng in tih.

11 Chuong ang lei chun, Pathienin a kona chĕu phua in um theina ding le thrat in nuomna po po le ringnaa in thilthaw tinrêng chu a hrătnaa a sukfamkimpĕk theina ding chêuin ma loin kan trongtraipek hlak chêu a nih. 12 Chuongchun, ei Pathien le Lalpa Isu Krista lunginsietna zărah ei Lalpa Isu hming chu chawimawiin um thei a ta, nangni khom ama zârah chawimawiin um thei bok in tih.