3 Pathien ditzawng chu hi hi a nih- in thienghlim hi. Chuleiin, inngaihai bănsan ro. 4 Mi tinin mani taksa^a seng thienghlim le inzaum taka thunun dan inchûk raw se. 5 Pathien hre lo Jentelhai angin tisa chăknaah tlu lût naw ro. 6 Hi thila hin tu khomin a unau hlĕmin a lakah thil thra naw thaw naw raw se; chuong ang thawtuhai chunga chun Lalpan phuba la’ng a tih ti hrilin kan inhriettir tah chêu kha. 7 Pathien chun thienghlim lo dingin a mi ko naw a, thienghlim taka khawsa dingin a mi ko lem a nih. 8 Chuleiin, hi thu poisa nawtu chun mihriem a poisa naw ni loin Thlarau Thienghlim petu chĕu Pathien a poisa naw a ni lem.

9 Pathienin nangni ngĕi inhmangai tuo dàn a’n chuktir ta chêu leiin unau in inhmangai dàn ding thu chu in kuomah ziek hran a ngai nawh. 10 Chuong ang chun Makedonia rama unau po po khom in hmangai hlak kha. Unauhai, chu chu thaw zuol pei dingin ka ngĕn chêu.

11 Kan infŭi tah ang chêu khan, dei dapa khawsain mani sin sengah inbûr unla, mani kut ngĕia sinthaw uor ro. 12 Chuongchun, in ni tin khawsakah puo tieng mi inzà phur in ta, tu chunga khom innghat naw bok in tih.

13 Unauhai, beiseina hrim nei lo mi danghai anga in lungngai nawna dingin, lo in tahai chanchin chu in hriet naw ka nuom nawh. 14 Isu a thi a, a tho nawk ti ei ring a, amaa in tahai chu Pathienin Isu leh hung thruoi a tih ti ei ring bok a. 15 Lalpa thuin hi hi kan hril chêu a nih: eini Lalpa hung chena dama la um zinghai hin a lo in tahai chu lekhal naw top ei tih. 16 Lalpa ngei chu, thupêk inring tak le vantirko ropui tak rawl le Pathien kona tawtawrawt ri leh, vana inthokin hung trum a ta, Kristaa thi tahai chu tho hmasang an tih. 17 Chu hnunga chun eini dama la um zinghai hi boruokah Lalpa hmuok dingin anni leh sûm lai khin lăk tungin um ei ta, Lalpa kuomah um kumkhuo ta’ng ei tih. 18 Chuleiin, hieng thuhai hin inthlamuong tuo hlak ro.