Inpei dinga infŭina
5
1 Amiruokchu, unauhai, a hun le ni thu chu in kuoma ziek a ngai nawh. 2 Lalpa ni chu zăna rûkru a hung angin a hung tlung ding a nih ti in hriet si a. 3 Mihaiin, “A him, a muong” an ti laiin nuhmei nauha se angin sietna an chungah hung tlung thut a ta, pumpel top naw ni hai. 4 Unauhai, nangni chu thima um in ni naw leiin chu ni chun rûkru angin nang naw’ng a ti chêu. 5 In rêngin var nauhai le ni nauhai in ni vong si a. Zăna mi ei ni naw a, thima mi ei ni bok nawh. 6 Chuleiin, mi danghai anga in ve loin, meng zingin ngaiven lem ei tiu. 7 Inhai chu zănah a nih an in hlak; zuruihai khom zănah a nih an inrui hlak. 8 Eini chu sŭna mi ei ni leiin ringna le hmangaina awmphaw hâkin, sandam beiseina chu lukhuma hmangin, har fîm takin um lem ei tiu. 9 Pathien lungsenna tuor ding ni loin ei Lalpa Isu Krista zara sandam ni dingin a mi ruot lem a nih. 10 Ei dam khoma ei thi khoma ama leh ei hring tlăng theina dingin ama chu ei ta dingin a thi ta si a. 11 Chuleiin, in thaw hlak ang hrimin, inthlamuong tuoin insukhrat tuo ro.Infŭina le chibai bûkna
12 Unauhai, in ta dinga inrim taka sinthawtuhai, Lalpaa nangni enkoltuhai le ziltuhai cheu chu hre zing dingin ka ngĕn chêu a nih. 13 An sinthaw leia hmangaiin ngai chunghnung tak unla, inngei diel dielin um ro. 14 Unauhai, ka ngĕn chêu hi, mi thabohai chu kawk unla, zaksehai chu sukphûr unla, mi hrat nawhai chu thrangpui unla, mi tin chungah dawthei ro. 15 Tu khomin tu suol khom suola thungrul lo dingin fimkhur unla, ieng lai khoma thil thra inthawpêk tuoin, mi po po chungah thil thra thaw pei ro. 16 Lawm rop unla, 17 ma loin trongtrai unla, 18 iengkimah lawmthu hril rop ro. Hi hi Krista Isu-a chun in ta dinga Pathien ditzawng a nih. 19 Thlarau mei chu sukmit naw ro. 20 Thuhriltuhai hmusit naw ro. 21 Iengkim fie unla, a thra taphot chu chel nghet ro. 22 Suol taphot laka chun inthier fihlim ro.
23 Remna Pathien ngei chun in pumin sukthienghlim sien chêu, ei Lalpa Isu Krista hung pha in thlarau le in lungril le in taksa a rêngin soisel boin inumtir raw se chêu. 24 A kotu chĕu chu a ringum a, thaw khom thaw ngêi a tih. 25 Unauhai, mi trongtraipĕk ro. 26 Unauhai po po kha fawp inthiengin mi hung chibaipêk vong ro. 27 Hi lekha hi unau po po hrieta tiem dingin Lalpa hmingin ka ngĕn chêu a nih.
28 Ei Lalpa Isu Krista lunginsietna chu in kuomah um raw se.