3
1 Chuongchun, kan nghăk zo ta uoi naw leiin, keini chauh Athen khuoah la châmbâng inlang thra tak dingin kan ngăi a. 2 Chuleiin, kan unaupa Timothe, Krista Chanchin Thra hrila Pathien rong kan bawlpui hi in ringna suknghet le sukphûr ding le hieng ang fiena leia nangni lai tu khom an inhnǐng nawna dingin kan hung tir a nih. 3 Nangni khomin hieng thil hi ei tuor ngĕi ding a nih ti in hriet ta sa a ni kha. 4 In kuoma kan um laia sukdŭdăna ei la tuor ding thu kan hril rop tah chêu ang tak khan a hung tlung tah a nih ti in hriet. 5 Hi lei hin, ringnaa in nghet pei le pei naw hre loa ka um thei tăk naw leiin le ieng kong zawngin amanih thlĕmtu chun thlêm hnè chêu a, kan sinthaw a thlăwn el palh kan inlău leiin Timothe hi ka hung tir a nih.
6 Timothe chu in kuoma inthokin a hung kǐr nawk tah a, chanchin lawmum tak, in ring nghetzie dam, hmangaina in hauzie dam, keinin hmŭ chêu kan chăk ĕm êm ang boka mi hmu in chăk vezie thu dam, ieng lai khomin in mi hriet zing ti thu dam a mi hril a. 7 Chuleiin, unauhai, in ringna a nghet leiin kan lungzingna le rinumna po poah lung muong takin kan um thei tah a nih. 8 Lalpaa in nghet pei lei hin kan ta dingin dam man a um. 9 Nangni zâra Pathien hmaa kan hlimna po po lei hin Pathien kuomah lawmthu hril kan va bat nasa de aw! 10 In hmĕl kan hmu theina ding le ringnaa in tlăksam kan phuhrŭk theina ding chêuin Pathien kuomah sŭn le zănin thrahnemngâi takin kan hni hlak.
11 Tu hin ei Pa Pathien le ei Lalpa Isu chun nangni kan hung kan theina ding chĕuin lampui mi siempêk raw se. 12 Keinin kan hmangai ang chêua nasaa in inhmangai theina dingin, in hmangaina chu Lalpan sukthrangin sukpungpêk chĕu raw se. 13 Chuongchun, a mi thienghlim po po le ei Lalpa Isu a hung phaa Pathien, ei Pathien hmaah thienghlim le soisĕl boa in um theina dingin in lungril suknghet bok raw se.