Thesalonikaa Paula rongbawlna
2
1 Unauhai, in kuoma kan hung inzin kha a thlăwn nawh ti nangni ngeiin in hriet. 2 In hriet tah angin Filipi khuoah inzakum taka soisak tuor inlang khom, dodălna tam tak karah in kuoma Chanchin Thra hril dingin Pathienin a mi sukhuoi ta lem hlauh a ni kha. 3 Kan thu hril chêu hi thu indik lo amanih, tum rûk tirdakum neia inhlĕm tumna thu amanih a ni nawh. 4 Chanchin Thra inkoltir tlăka Pathienin a mi ruot ang ngeiin, mihriem suklawm tum ni loin, kan lungril fietu Pathien suklawm dingin thu kan hril lem hlak a nih. 5 Ieng lai khomin mi kan inpăk der ngai naw a, duâmna thup dingin hmaithinghawng kan inbel ngai nawh ti in hriet a, mi hrepuitu chu Pathien a nih. 6 Mihai inpăk kan phŭt naw a, nangni amanih mi dang amanih inpăk kan ngiet bok nawh. 7 Krista tirko kan ni leiin in ta dinga phurrik inchang thei kan ni a, sienkhom nuin a nauhai a duot angin kan duot lem chêu a ni kha. 8 Chuong ang khopa ngainaa kan hmangai ĕm chêu leiin, Pathien Chanchin Thra chauh ni loin kan hringna chen khom hlim taka pĕk chêu kan inhuom a ni kha. 9 Unauhai, sin kan thaw inrimzie le thaw nasatzie kha in hriet a, nangni lai tu khom kan sukharsat nawna dingin, a sŭn a zăna sin inrim taka thaw pumin Chanchin Thra kan hril hlak chêu a ni kha.
10 Thienghlim le fel le dem kai loin ringtu nangnihai lai kan um hlak ti hretu chu nangni in ni a, Pathien khom a nih. 11 Pain a nauhai chunga a thaw angin nangni chunga khom kan thaw hlak ti in hriet. 12 A ram le a ropuina chang ve dinga kotu chĕu Pathien mi ni tlâka um dinga sukphûr le thlamuongin, kan infŭi mol mol hlak chĕu a ni kha.
13 Kan thu hung hril in lo pom lai khan, mihriem thu anga pom loa Pathien thutak a nina ang taka in pom lem lei khan ma loin Pathien kuomah lawmthu kan hril bok hlak. Chu chu nangni ringtuhaia thok hlak, Pathien thutak ngĕi chu a ni hrim a nih. 14 Unauhai, nangni khom Judai rama Isu Kristaa um Pathien kohranhai ang in lo ni ve tah; annin Judahai lakah an tuor angin nangni khom in mihai lakah in tuor kha. 15 Chuong Judahai chun Lalpa Isu le anni zawlneihai ngei an that a, keini khom an mi hnot suok a, Pathien an suklawm naw a, mi dang hrim hrim an dodâl vong a nih. 16 Jentelhai sandam an ni vĕna dinga Chanchin Thra an kuoma kan hril chen khom an khap a, an suol văwr tăwp an tong a, a tăwpah Pathien lungsenna chu an chungah a hung tlung tah a nih.
17 Sienkhom, unauhai, lungril tieng ni loin taksa tieng hun iemani chen ei lo inthrè tah a, chuleiin in hmĕl hmu nawk kan chăk a, hmu chêu tumin kan thrang nasa a nih. 18 Hung sir chêu kan tum hlak a, kei Paula ngei khom hin ka tum rop a, sienkhom Setanin a mi dăl hlak a. 19 Ei Lalpa Isu hung nawk phaa thil kan beisei, kan hlimna ding le chawimawina suongum a hmaa kan khum ding chu nangni naw tu dang am ning an ta? 20 Nangni hi kan ropuina ding le kan hlimna ding chu in nih.