2 Nangni leiin Pathien kuomah lawmthu ka hril rop hlak. 3 Ei Pa Pathien hmaa kan trongtrai chăngin in hming ma loin kan lam hlak a, ringna leia in thaw suok hai, hmangaina leia sin in thaw inrimzie hai le ei Lalpa Isu Kristaa beiseina in nei nghetzie hai kan hriet zing hlak.

4 Unauhai, Pathienin a hmangai chêu a, ama ta dingin a thlang suok chêu ti kan hriet. 5 In kuoma Chanchin Thra kan hung intlun lai khan thu el ni loin, thilthawtheina leh Thlarau Thienghlim ring nghet tlatin kan hung hril a, nangni lai kan chăm sŭnga in ta dinga kan khawsak dan khom in hriet kha. 6 Kan um dàn le Lalpa um dàn latuhai in ni tah a, rinumna nasa tak tuor pumin kan thu in lo pom a, Thlarau Thienghlimin lawmna a pêk chĕu a. 7 Makedonia le Akaia rama ringtu po po ta dinga enton tak in hung ni a; 8 an ramah Lalpa thu nangni leiin a’n dar el chauh băkah hmun tinah Pathien in ring thu a’n thang a; chuleiin, keinin ieng khom kan hril a trûl ta nawh. 9 Kan hung kan chêu truma in mi lo lawm dan hai, milim biek bănsana Pathien hring le indik tak rong bawl dinga Pathien tieng in hung nghat tăk thu hai, 10 a Naupa Isu, mithi laia inthoka a keitho, lungsenna hung tlung ding laka mi san suoktu chu vana inthoka a hung ding in lo nghăk thu dam an hril huoi huoi a nih.