2 Trongtrai fan fan unla, invêng zing unla, lawmthu hril rop ro. 3 Kol ka bunna san, Krista thurŭk kan tlăng insampuinaah Pathienin a thu kan hrilna ding kot a mi hongpĕk theina dingin mi trongtraipek bok ro. 4 Ka hril tum ang tak ka hril theina dingin mi trongtraipêk bok ro. 5 Ringnawtuhai lakah var takin um unla, anni lakah in hun a hlawk thei ang takin hmang ro. 6 Ieng lai khomin tlâi tak le hawihawm taka trong chîng unla, chuongchun mi tin an mamaw ang peia don dan thiem thei in tih.

7 Lalpaa ka siehlaw chanpui, rongbawltu ringum tak le ka unau dit tak Tukik hin ka chanchin po po hril a ti chêu. 8 Kan chanchin in hriet a, lungril hlim taka in um theina dingin ka hung tir a nih. 9 Ama ruol hin nangni mi, unau dit tak Onesima, ringtu nghet tak hi ka hung tir ve a, hieng tieng chanchin hi hung hril vong an ti chêu.

10 Ka’n tăngpui Aristarka hin chibai a bûk chĕu. Barnaba tupa Marka khomin chibai a bûk chĕu. Ama hi in kuoma a hung pha lo lawm lut dingin ka hril ta chêu kha. 11 Isu, Justa an ti hin chibai a bûk chĕu. Juda Kristienhai lai chu anni chauh hi Pathien ram ta dinga mi thawpuitu an ni a, an mi thlamuong hlè a nih.

12 Epafra, nangni mi, Krista Isu siehlaw hin chibai a bûk chĕu. Nghet taka in ngǐr a, in hung puitling a, Pathien ditzawng anga ringtu indik tak in ni theina dingin thrahnemngai takin a trongtraipĕk hlak chêu a nih. 13 Nangni rawi ta ding dam, Laodikei khuoa mihai le Hairopolis khuoa mihai ta ding damin ama hi a thok nasa ĕm êm ti ka hriet bok

14 Luka, daktor dit tak le Dema hin chibai an bŭk chêu.

15 Laodikei khuoa unau umhai le Numfa le a ina kohran inkhawmhai kha chibai mi hung bûk ro. 16 Ka lekha hi nangni lai in tiem zo pha Laodikei kohran khom intiemtir ve ro, chuong ang bokin Laodikei kohran lekha hi lo tiem ve ro. 17 Chun, Arkhipa kuoma khan, “Rongbawl sin Lalpa kuoma inthoka i dong kha hlen dingin thrang la rawh” ti hi mi hung hrilpêk ro.

18 Kei Paula hin keima kut ngeia chibai ka hung bŭkna chĕu a ni hi. Ka kol bun hi hung theinghil ngai naw ro. Lunginsietna in kuomah um raw se.