Ringna leia thiemchangna
3
1 A tawp taka chun unauhai, Lalpaah lawm ro. Thu pangngai bok in kuoma ziek hi ka ta dingin thil nghokum a ni nawh, nangni invĕngna dingin a thra bok si a. 2 Thil thra naw thawtu uicho ruol, sertan uorhai laka chun invêng fimkhur ro. 3 Pathien Thlarau zara Pathien chawibiektu le Krista Isu uongpuia puo tieng thila innghat ve nawtu einihai hi sertan indik tak chu ei ni lem. 4 Nuom lang chu kei khomin puo tieng thil chu ka uongpui ve thei tho annawm. Miin puo tieng thil uongui theia an inngai chun kei lem chun inngai nawkzuol ka tih. 5 Ni riet nia sertan, Israel thlaa mi, Benjamin chia mi, Hebrai nu le pa kara inthoka pieng, Dan zawm tieng chu Farisai, 6 thrahnemngaina tieng hlak kohranhai suknomnatu ka na; Danin a phŭt ang felna tienga khom soisel bo ka nih.7 Nisienlakhom, tu hin chu chuong ang thil, ka ta dinga hlawkna taphot chu Krista leiin kiemnaah ka tiem ta vong a nih. 8 Chu chauh chu a ni lèm, iengkim neka hlu lem ka Lalpa Isu Krista hrietna le bûkkhi chun iengkim hi hnephnawlah ka ngai a; Krista chu ka nei theina ding le ama leh pum khat kan ni theina dingin, ama leiin iengkim ka chân tah a; 9 Dan zawm lei ni loin Krista ka ring leiin thiem ka chang tah a, chu chu ringna leia Pathien hmaa thiemchangna chu a nih. 10 Ka thil hlut sun chu Krista hriet dam, a thonawkna thilthawtheina chang dam, a tuor ang tuor ve dam le a thǐna intrawmpui dâm hi a nih. 11 Chuongchun, mithi thonawkna nia chun keitho ni vê ngĕi ka tih.
Tum ram pana tlân
12 Hieng thilhai hi chang tah le siem famkima um tah inti ka ni nawh; Krista Isu mi man san chu hlen ngei tumin hma tieng ka nor pei a ni lem. 13 Unauhai, thangsuo taah ka’n ngai dèr nawh. Amiruokchu, thil pakhat ka thaw hlak chu hi hi a nih: Hnung tieng thilhai chu theinghilin hma tieng thilhai chu ka hnot trăng trâng a, 14 Isu Krista zara lawmman hmu dinga chung tienga Pathien mi kona chu chang ve ngei dingin, tum ram tieng chu ka pan ngat ngat a nih.
15 Eini puitling chin tahai lem chun chuong ang lungril chu put ei tiu. Chun, kong threnkhatah in ngaidan a danglam a ni khomin, chu chu Pathienin chieng takin la’n hriettir a ti chêu. 16 Ieng khom ni sien, tuta ei phak chin po bĕk hi ei nunah la sukdik phot ei tiu.
17 Unauhai, ka um dan inchuktuhai ni pei ro; um dan ding kan hril chêu anga khawsahai chu enton takah hmang ro. 18 An khawsak danah Krista kraws hmĕlma tam tak an um ti ka hril rop ta chêu kha, tu khom hin mitthli pumin ka hril non nawk chêu a nih. 19 Chuonghai tawpna ding chu sietna a nih. An pathien chu an phîngpui a na, an ropuina chu an inzakna bŭr a na, khawvel thil ringot an buoipui hlak. 20 Eini ruok chu van khuo-le-tui ei na, vana inthoka ei sandamtu Lalpa Isu Krista hung nawkna ding chu nghakhlâ takin ei thlir a nih. 21 Iengkim a thu hnuoia sie theitu chun ei taksa tlâwm tak hi ama taksa ropui anga um dingin a thilthawtheina chun a sukdanglam ding a nih.