Krista inngaitlăwmna le ropuina
2
1 Krista le in inzomnaa inthokin nangniah phŭrna dam, a hmangainaa inthokin thlamuongna dam, Thlarau hmun khata inpawlna dam, inlainatna le inlunginsietna dam in nei am? 2 In nei chun lungril hmun khat puta inhmangai tuoin, thlarau le thiltum hmun khat nei unla, ka lawmna sukkim ro. 3 Mani trânghma siel tak le inngaihlu taka ieng khom thaw loin, tu khomin inngaitlawm takin, mani nĕkin mi dang thra lemah ngai raw se. 4 Mani hmàkhuo chauh ngai loin mi dang thratna ding khom zong ro.5 Krista Isu lungril ang put ro. 6 Ama chu niphung hrimah Pathien ni sien khom, Pathien tluka um chu tum tlat dingah a ngai naw a, 7 iengmalo anga insiein, siehlaw angin a’n siem a, mihriema hung piengin mihriem angin a hung um a, 8 a’n ngaitlawm a, thi chena thu zawmin, kraws-ah a hung thi a. 9 Chuleiin, Pathienin ama chu hmun chunghnung takah a chawi sang a, hming po poa hming chunghnung tak a pêk a. 10 Chuongchun, Isu chawimawiin mi tin, vana mi hai, hnuoia mi hai, hnuoi hnuoia mihai a hmaah dingthrathruon an ta, 11 Pa Pathien ropuina dingin mi tinrêngin. ‘Isu Krista chu Lal a nih’ tiin puong an tih.
Khawvel ĕntu ni dinga infuina
12 Chuleiin ka dittakhai, ka um laia ka thu in awi ang khan tuta ka um naw kâr khom hin in awi nawkzuol a trûl a nih. Tri le inzà tak pumin in sandamna chu thaw suok ro. 13 Ama ditzawng thaw tumna leh thaw theina nei dinga nangnia sinthawtu chu Pathien a ni si a. 14 Chier lo le sêl loin iengkim thaw ro, 15 chuongchun tu lai ruolthar mi kawi le lungril piengsuolhai lai hin Pathien nau, dem kai lo, soisĕl bo le thienghlim le khawvel elvartu hung ni thei in tih. 16 Hringna thu chu inhlàna pei unla, chuongchun Krista Ni-a ka suong dinghai chu ni’ng in ta, ka tlân thlawn nawzie le ka sawl thlawn bok nawzie suklangtu ni’ng in tih. 17 Ringnaa in rongbawlna le in hlanbieknaa chun ka thisen hiel hi uoiin anga bun thlâka um ding ni sien khom, lawm ka ta, nangni khom lawmpui bok ka ti chêu. 18 Chuong ang bokin nangni khomin lawm unla, mi lawmpui bok ro.
Timothe le Epafrodita
19 In chanchin hre a, ka hlim theina dingin Lalpa Isun a remti chun in kuomah Timothe ka hung tir vak thei ka beisei. 20 Lungril taka keima anga in thratna ding zongtu chu ama chauh hi a nih. 21 Mi dang chu Isu Krista ta ding ngaituo loa mani trânghma zong vong an nih. 22 Timothe ruok chu a trangkaizie in hriet tah a, pafa ang topin Chanchin Thra rong kan bawl tlâng hlak kha. 23 Chuleiin, ka chanchin ding ka hriet charin ama hi ka hung tir nghal ka beisei. 24 Lalpan rem a ti chun kei ngei khom ka hung vak ka ring.
25 Ka unaupa, ka sipaipui le rongbawlpui, ka mamaw phuhrûktu dinga in hung tir Epafrodita hi in kuoma hung tir kîr trûlin ka hriet. 26 In rêngin a ngai ĕm êm chêu a, a nat thu in lo hriet khom kha poi a ti hlè a nih. 27 Thihmun suola nâ a ni hrim a, nisienlakhom Pathienin a lunginsiet a, ama chauh ni loin kei khom a mi lunginsiet a, lungngaina chunga lungngai nawkzuolna tuok loin a mi siem a. 28 Chuleiin, ama hi in hmu nawk phaa in lawmna ding le ka lungkhamna hi a rĕ theina dingin ka hung tir inhawk zuol a nih. 29 Lalpa hmingin hlim takin lo lawm unla, hieng ang mi hi ngaihlu ro. 30 Nangniin kut ngeia in mi hung thrangpui phâk si naw leiin thi huomin Krista sin a thaw a, a thì phá vàng nghé nghè a nih.