Infŭina thuhai
4
1 Chuleiin, ka unau dittak le ka ngai ĕm êm, ka lawmna le ka lallukhumhai, chuong ang chun Lalpaah ngîr nghet ro aw, ka ruol dittakhai!2 Lalpaa chun lungril hmun khat put dingin Eudi le Suntuki khom ka ngĕn. 3 A nih, nang, ka ringkol bătpui ringum tak,a khâng nuhmeihai kha thrangpui dingin ka ngĕn che; anni khan Klemen le Hringna Bua hming chuong danghai leh, Chanchin Thra rongbawlnaah an mi thawpui nasa hlè a nih.
4 Lalpaa chun lawm rop ro, ti non ka tih, lawm ro. 5 In dawtheizie mi po poin hre raw hai se. Lalpa chu a hnâi zing. 6 Ienga khom lungzing naw unla, iengkimah lawmthu hrila trongtraiin in mamawhai chu Pathien kuomah intlun ro. 7 Chuongchun, Pathien thlamuongna, mihriem hriet seng ruol lo chun in lungril le ngaituonahai chu Krista Isu-a chun vêngpêk a ti chêu.
8 A tâwp taka chun unauhai, thil indik le inzaum taphot dam, a fel le inthieng taphot dam, ditum le inthangmawi taphot dam, thil thra chungchuong le inpâk tlâk thil taphot dam chu ngaituo hlak ro. 9 Ka kuoma inthoka thil in inchŭk le donghai, in thil hriet le hmuhai kha thaw pei ro. Chuongchun, thlamuongna Lalpa chun umpui a ti chêu.
Thilpêk chunga lawmthu
10 In mi ngaituozie tu lai hnâi elah in hung inlangtir nawk thei leiin Lalpaa chun ka lawm takzet a nih. In mi’n voi hle ti ka hriet a, chu chu remchang in la hmu hri el naw leiin a hmâ khan in la’n entir naw mei mei a nih. 11 Hi thu hi ka tlăksam leia hril ka ni nawh; ieng ang khomin um lang, lungawi taka um dan ka’n chŭk ta si a. 12 Rethei taka um dan ka thiem a, hausa taka um dan khom ka thiem bok a; iengkimah khop le trâma um dan, hausa le retheia um dan thurûk ka’n chŭk tah. 13 Mi sukhrâttu Krista zărin iengkim ka thaw thei. 14 Ieng khom ni sienla, ka harsatnahai in mi lo phurpui hi in thaw thra ngot el.
15 Chanchin Thra ka hril tran laia Makedonia ka suoksan hnung khan nangni Filipi kohran chauh naw chu kohran dang tu khom thilpêk le dong thuah mi ngaituopui an um nawh ti in hriet tah kha. 16 Thesalonika khuoa ka um lai khom khan ka tlăksamna phuhrûk dingin thilpêk in mi hung thon rop hlak kha. 17 Thilpêk ka zong naw a, in chan sukvăwngna ding ka zong lem a nih. 18 In thilpĕk po po ka lo hmu kim bakah Epafrodita kuta in thil hung thonhai khom ka lo hmu leiin ka burip ta khop el. Hieng hi rimtui thilhlân, Pathien lawmzawng le pom tlâk chu a nih. 19 Ka Pathien chun Krista Isua a hausakna ropui taka inthokin in mamaw tinrêng pe’ng a ti chêu. 20 Ei Pathien le ei Pa chu chatuonin ropui raw se. Amen.
Chibai bûkna