2 Pathien ei Pa le Lalpa Isu Krista kuoma inthoka lunginsietna le inremna chu in kuomah um raw se.

3 Ka hriet suok po chêu leh ka Pathien kuomah lawmthu ka hril hlak. 4 Ieng huna khom in rênga ta dinga ka trongtrai chângin hlim takin ka trongtrai hlak, 5 Chanchin Thra hril rongbawlna ei trana inthoka tu chena mi thawpuitu in ni si a. 6 Nangni laia hi thil thra thaw trantu chun Krista Isu Ni-a a hlen suok chenin thaw pei a tih ti ka ring tlat a nih. 7 Chanchin Thra ta dinga thrang ka lăkna le suknghet sin ka thawna amanih le kol ka bun chânga Lalpa lunginsietna mi’n tlângpuitu in ni leiin ka ngaituonaah in châm zing a, hieng ang lungril in rênga chunga ka put khom hi thil âwm tak a ni hrim a nih. 8 Krista Isu lungril ang putin ka ngai ĕm êm chêu a nih ti Pathienin a hriet.

9 In hmangaina chu hrietnaa dam, thil tinrêng fie tak le inril taka hmu theinaa dam inthrang liena a hung pung deu deu theina dingin ka trongtrai hlak. 10 Chuongchun, thil thra bǐkhai chu thlang thiemin, Krista Ni-a chun thienghlim le soisel bo hung ni thei in ta, 11 Pathien ropuina ding le inpâkna dingin Krista Isu zărah felna râ chun sung sipin um in tih.

12 Unauhai, ka chunga thil hung tlunghai kha Chanchin Thra sukdarna ding a lo ni ta lem hlauh a nih ti in hriet ka nuom. 13 Krista leia kol bun ka nih ti lal in vengtuhai^a le mi dang po po khomin an hriet tah. 14 Unau tam lem khomin ka kol bun leiin Lalpa an ring nghet sauh a, tri lo le huoisen nawkzuolin thu an hril ngam tah.

15 Threnkhat chun thîkna le elrelna leiin Krista thu an hril ve hlak a; threnkhat ruok chun ditsakna lungril putin an hril bok a. 16 A nuhnung pawl hin Chanchin Thra ka tran leia hung ka nih ti hrein, hmangaina leiin an hril a; 17 a hmasa pawl ruok hin chu mani trânghma kei zawngin, thaw tak tak loin, kol ka bun lai hin ka chungthu a rik zuol theina dinga buoina chok suok tumin, thu an hril thung a. 18 Sienkhom iem a poi a? A lem amanih a tak amania an hril khom ni sien, Krista thu hrila a um hrim hrim hi poimaw ka ti le ka lawm tak chu a nih, lawm pei bok ka tih.

19 In mi trongtraipekna lei le Isu Krista Thlarau thrangpuina leiin ka chunga thil tlunghai hi a mi sansuoktuah hung inchang lem a tih ti ka hriet. 20 Ka duhthusam tak le ka beisei tlat chu, ienga khom sukmuolphoa um lo a, ieng huna khom, tuta trum ngei khom hin, ka dam amanih ka thi amanih khomin huoi taka um a, ka taksaa Krista ka chawimawi hi a nih. 21 Ka ta ding chun hring hi Krista a na, thi khom hlâwkna a nih. 22 Dam pei lang trangkaina ka la nei ding a ni si leiin, a ieng lem am thlang ding bik ka hriet nawh. 23 Chamlakin ka um a, fe suoka Krista kuoma um châkna ka nei a, chu chu a thra lem hle a; 24 amiruokchu, nangnihai leiin ka la dam zing a trûl bok si. 25 Ringnaa in rênga in inthranglienna ding le in lawmna sukpunga a umna dingin ka la dam pei hi a thra lemin ka hriet tah. 26 Ka hung nawk pha chu keima leiin Krista Isu-a in lawmna luong liem a tih.

27 Ieng khom ni sien la, in um dan chu Krista Chanchin Thra leh inmawi phot raw se. Ka hung amanih ka hung naw amanih khoma thlarau hmun khata ngîr nghetin, ringna hmun khat put unla, chuongchun, Chanchin Thra thuah in thrang tlàng ti le 28 a dotuhai chêu chu iengti kong khomin in tri nawh ti lo hre thei ka tih. Chu chu an la tlawm dingzie le san suok in la ni dingzie inchikna chieng tak ning a tih. Chu thawtu chu Pathien a nih. 29 Krista ring el chauh khom ni loa a ta dinga tuor dinga rongbawlna sin inhlàn in nih. 30 Chu inbeina, ka tuok in hmu ta hlak le tuta ka la tuok zing in hriet hi, nangni khomin in tuok ve tah a ni hi.