FILIPI
Thuhma
Filipi mihai kuoma Tirko Paula lekhathon hi Baibul pumpuia bu 50-na, bung 4 le châng 104 a sei a nih. Filipi hi Rom sorkar biel Makedonia rama khaw poimaw pakhat a na, Europe rama Paulan kohran a phun hmasakna tak a nih.
A.D 62 lai vel khan Rom khuoa Paula lung in intăng laiin somdawlna thilpek Filipi kohranin inchawitirin Epafrodita an tir a, Roma a um lai a damnaw rak a, an kohran khom a suklungzing hle a. A hung dam nawk chun Paulan Filipi tieng a tirkir nawk a, hi lekhathon hi lawmthu hrilna le infŭina infawmin a’n chawitir a nih. Lung ina inthoka a ziek a ni băkah Filipi khuoa Chanchin Thra hril ve tho, zirtirna indik lo thedartuhaiin Paula chu nasa taka doin a lungril sukna thei hle hai sien khom, hlim tak le ngai thra taka a um thei hin Krista a ring zozie chieng takin a suklang. Lawmthu a hril băkah, harsatnain ringtuhai tlâk buok hlak sien khom sel tak le huoi taka um pei dingin a’n fŭi a. Mani hma siel a, chapo taka khawsa loin, Krista lungril ang, inngaitlawmna lungril put dingin a’n fûi bok a nih.
Chun, Judahai Dan an zawm lei ni loin, an ringna lei lema Pathien lunginsietna thilpek, Kristaa hringna chu an dong a ni thu le Kristaa umhai chu Pathienin lawmman le thlamuongna a pêk hlak thu a hril tawl bok a nih. Thi ding hmabak el ni sien khom ngaingam takin a um a, “Ka ta ding chun hring hi Krista a na, thi khom hlawkna a nih” tiin a hril. Filipi kohran a ngainatzie le a ngaizie a lekhathona hin a’n lang chieng hle.
A sung thu tlangpui
Thuhma (1:1-11)
Paula lung in intàng (1:12-26)
Timothe le Epafrodita (2:19-30)
Hmêlma le thil trium (3:1-4:9)
Paula le Filipi-a a ruolhai (4:10-20)
Tlangkawmna (4:21-23)