Naupanghai le nu le pa
6
1 Naupanghai, Lalpaa chun in nu le pa thu awi ro, chu chu thil indik a ni si a. 2 “I nu le pa chawimawi rawh” ti hi thupêk laia thil tiem sa nei hmasa tak a nih. 3 “Chuongchun i ta dingin thra’ng a ta, hnuoiah dam sawt bok i tih” a ti a ni kha.4 Nangni pahai, in nauhai suklungsen naw ro, Lalpa thu zawm dinga thununin inchuktir lem ro.
Bawi le a pu
5 Bawihai, Krista thu in zawm angin lungril indik putin, tri le inthin pumin hnuoia in puhai thu zawm ro. 6 Mihriem suklawm tumtu ang ela an hmu lai chaua thaw loin, Krista bawi ni awm hrimin lungril takin Pathien ditzawng thaw unla, 7 mihriem rongbawl el ni loa Lalpa rongbawl in ni lem leiin hlim takin thaw hlak ro. 8 Bawi khom, bawi naw khom, mi tinin an thilthaw thrat lawmman chu Lalpa kuoma inthokin an dong seng ding a nih ti in hriet si a.
9 Nangni hotuhai, chuong ang bokin in bawihai chungah thaw ve ro. In bawihai le in intrawm hotu, thlier bik nei lo chu vanah a um ti hre zingin, in bawihai inthri le vauh chîng ta naw ro.
Pathien ralthuom
10 A tawp taka chun Lalpa le a hratnaa inthokin thilthawtheina la pei ro. 11 Diebol zăwrna chu in do zo theina dingin Pathien ralthuom kimin inthuom ro. 12 Ei dohai hi mihriem râla ni loin, lalna hai, thuneina hai, hi khawvel inthim chunga rorêltuhai le van hmuna thlarau suol umhai chu an ni lem si a. 13 Chuleiin, ni thra lo a tlung hunah hmêlma in dang theina ding le in dang hnunga khom in dingchang theina dingin, Pathien ralthuom kim chun inthuom ro.
14 Chuongchun, nghet taka ngîrin, thutaka in kăwng hrënin, felna awmphaw chu hâk ro. 15 Remna Chanchin Thra chu pheikhokah bunin, sirsan nghetah hmang unla, 16 misuolpa meithalhlawnhai chu in sukmit theina dingin ringna awmphaw hâk bok ro. 17 Sandamna chu lukhumah hmang unla; Thlarau kawlhnâm, Pathien thu chu, pâi zing ro. 18 Ieng huna khom thlaraua trongtraiin, in mamaw taphot chu hni hlak ro. Hi hi hre zingin, in trongtraiin mi thienghlim po po ta dingin ma loin hni ro. 19 Thu ka hril chănga Chanchin Thra thu ril huoi taka puong ding thu ka dong theina dingin kei khom mi hnipêk bok ro. 20 Chanchin Thra palai, lung ina intâng ka na, ka hril dan ding ang taka huoi taka ka hril theina dingin mi hnipêk ro.
Inthlàna chibai
21 Lalpaa unau dittak le rongbawltu ringum tak Tukik hin ka chanchin in hriet theina dingin iengkim hril a ti chêu. 22 Ka chanchin hril ding chêu le thlamuong ding chêuin ama hi ka hung tir a nih.