3 Pathien mi thienghlimhai khawsak dan dinga mawi lo inngaina suol dam, porchĕna dam le duâmna dam hi nangni lai a sămin sâm sin naw hrim hrim ro. 4 Zawlro hril hai, trong mawi naw thaw le fiemthu bawraw hrilhai in ta dingin a mawi nawh; lawmthu hril chîng lem ro. 5 Inngai chînghai, mi tirdakum hai, mi duâm, (chuong ang milim betu) hai chun Krista le Pathien ramah chan hrim an nei nawh ti hre chieng ro.

6 Tu khomin thu tep lo mei meiin hlĕm naw raw hai se chêu; chuong thilhai lei chun Pathien lungsenna chu thu awinawhai chungah a tlung hlak si a. 7 Chuleiin, anni chu inpawlpui naw ro. 8 Kha hma khan in inthim a, tu ruok hin chu Lalpaa chun in hung var tah. Chuleiin, var nauhai angin um ro. 9 Var chu thratna dam, felna dam le thutak tinrêngin a ra suok hlak. 10 Lalpa lawmzawng hriet fie tum lem ro. 11 Ra nei lo thim thilthawa chun thrang ve naw unla, an indik nawzie suklang lem hlak ro. 12 A rûka an thilthaw hlakhai chu a hril khom inzak a um si a. 13 Ieng khom varin a sun chu a’n lang chieng hlak; var chu iengkim sukvartu a ni si a. 14 Chuleiin Pathien Lekha thua khom,

15 In khawsak danah fimkhur unla, mi invêthai anga um loin mi varhai angin um lem ro. 16 Hun thra naw taka um ei ni leiin in hun hmang thra ro. 17 Chuleiin, invêt taka um loin Lalpa ditzawng chu hriet fie tum lem ro. 18 Uoiin inrui chîng naw ro, chu taka chun zuolkaina a um si a. Chuong nĕkin, thlaraua sipin um lem ro. 19 Inpâkna hla hai, Pathien hla hai le thlarau tieng hla hai chu inzawt tlăngin, lungril taka hla sakin Lalpa chu rimawi rempêk ro. 20 Ei Lalpa Isu Krista hmingin ieng lai khomin iengkimah Pa Pathien kuomah lawmthu hril rop ro.

21 Krista in inzà ang bokin inzà tuo ro. 22 Nuhai, Lalpa thu in awi angin in pasalhai thu khom awi ro. 23 Krista chu ama taksa kohran sandamtu le kohran lû a ni ang hin, pasal chu nuhmei lû a nih. 24 Krista kuoma kohran a’n tuklŭt ang bokin, nuhmeihai khom kong iengkimah an pasalhai kuomah an intuklŭt ding a nih.

25 Pahai, Kristan kohran a hmangai ang hin in nuhmeihai hmangai ve ro. 26 Thu chu tuia hmanga Kohran sawp fai ding le sukthienghlim dingin ama Krista ngei chu a hung inpĕk a. 27 Kohran ropui tak, bal kai lo, zûr lo le hmêl hemna hrim hrim nei lo chu ama ta dinga indin dingin a’n pĕk a nih. 28 Chuong ang bokin, pasalhai chun mani taksa an hmangai angin an nuhmeihai khom an hmangai ve ding a nih. Mani nuhmei hmangaitu chun ama a’n hmangai a nih. 29 Tu khomin mani taksa an theida ngai nawh, Kristan kohran a enkol angin, chawmin an enkol lem hlak; 30 eini khom a taksa penghai ei ni si a. 31 Pathien Lekha thua chun, “Chu lei chun pasalin a nu le pa maksan a ta, a nuhmei leh inkop an ta, chuongchun an pahni chun taksa pumkhat hung ni tang an tih” ti a ni a. 32 Hi hi thu inril le inthûk tak a na, kei chun Krista le a kohran thu a hrilna niin ka hriet. 33 Ieng khom ni sien, nangni lai tu khomin ama a’n hmangai ang charin a nuhmei khom hmangai raw se; nuhmei khomin a pasal a’n zà ding a nih.