Kristaa taksa pumkhat
4
1 A kona chĕu ang nun chu phùa khawsa dingin kei, Lalpa ta dinga tâng hin ka ngĕn chêu. 2 Kong tinrêngah inngaitlawm le thuhnuoirol takin hmangainain zâi indaw tuo ro. 3 Inrem taka insuikhawmin, Thlaraua inpumkhatna chu vong zing dingin iengkimah thrang la ro. 4 Beisei hmun khat nei dinga ko in ni angin taksa pakhat le Thlarau pakhat chauh a um. 5 Lalpa pakhat, ringna hmun khat, baptisma hmun khat, mi po po Pa, Pathien pakhat chauh a um. 6 Ama chu iengkim chunga um, iengkim fang suok, iengkima um bok a nih.7 Lunginsietna thilthlawnpek chu Krista’n hun a ti ang peiin a mi pêk seng a. 8 Chu lei chu annawm Pathien Lekha thuin hienga a lo hril kha:
“Chung tieng a hang fe khan
Sala manhai chu a thruoi a,
Mihai chu thilpêk a sem a.”
9 ‘Chung tieng a hang fe’ ti hi ieng ti na’m a na? Leihnuoi hmun inhnuoiah a hung thla hmasa zet tîna a nih. 10 Iengkim a hluo vong theina dingin, hnuoia hung thla ngei kha, van po po laia insang takah a hang fe nawk tah a nih. 11 Ama chu a nih threnkhat tirko ni ding dam, threnkhat zawlnei ni ding dam, threnkhat evanzelis ni ding dam, threnkhat pastor le zirtirtu ni ding dama ruottu chu. 12 Chuong ang chun Krista taksaa sukpuitlingna dinga rong an bawl theina dingin Pathienin a mi thienghlimhai chu a hung inthuom a nih, 13 ringna le Pathien Naupa hrietna kongah zai khata luong a, hung puitling a, Krista a famkim anga ei hung famkim ve theina dingin.
14 Chuongchun, mi vervêkhaiin dawhaa hlĕm kăwi a, zirtirna hrang hrang fâwn vĕlin khing tieng khing tieng a tăwm lĕng thei naupang sie ang ni ta naw’ng ei tiu. 15 Chuong nèk hmanin, hmangainaa thutak hrilin, iengkimah ama ei Lu tak, Krista-a chun inthranglien lem ei tiu. 16 Amaa chun taksa bung tinrêng chu inchuktuoin, thâ le zungin a phuor khawm a, taksa bung tin chun an thaw ding ang seng thawin an inthrang tlăng a, hmangainain an inchawm lien tuo hlak a nih.
Nun hlui le nun thar
17 Chun, Lalpa hmingin hi hi hrilin ka ngên tlat chêu: Lungril mumal bo Jentelhai angin um ta ngai naw ro. 18 Hrietna tieng an inthim a, an măwlna chun an lungril a sukngar leiin Pathiena hringna leh inzom thei ta loin an um a. 19 Inzak nachâng khom an hriet ta naw a, zâuthăuna nunah an intăl lŭt a, thil tirdakum tinrêng an thaw a, an tisa chăkna hlak a zuolkai tul tul bok. 20 Nangnin Krista in hung hriet dan ruok chu chuong ang chu a ni ve nawh. 21 Chieng takin a chanchin in hriet a, ama Kristaa thutak um chu inchûktir in ni tah khah. 22 Tisa chăknain a sukkhawlo tah, in nun dan hmasa, mihriem hlui kha hlîp thlain, 23 in lungril put danhai siem thar unla, 24 felna le thienghlimna indika Pathien anga siem, nǐna thar chun inthuom ro.
Nun thara nun dan ding
25 Chuongchun, khêlhril bănin, mani vênghai kuomah thudik hril seng ro, inpêng tuo vong ei ni si a. 26 In lung a sen khomin thil suol thaw phà naw ro; nisa tlâk chen chen lungsen naw ro.b 27 Diebol chu hmun remchăng inkien naw ro. 28 Rûkru hmang chun bănsan sien la, mi tlasamhai kuoma pĕk ding a nei theina dingin mani kut ngeia thil thra thawin thok inrim lem raw se. 29 Trong mawi lo in băua inthokin suok naw sien, mi siem thra thei ding chauh suok lem raw se, chuongchun a ngaithlatuhai khomin hlăwkpui an tih. 30 Pathien Thlarau Thienghlim chu sukbeidong naw ro, tlanna nia dinga ama ta ngei in nizie Pathienin a’n chikna chĕu a nih. 31 Khâkna dam, lungsatna le lungsenna dam, inhal buoi dam, inhril siet dam le mi siet ding ditna po po dam bànsan ro. 32 Inlungsietin inlainat tuo unla, Pathienin Kristaa a ngaidam ang chĕu khan inngaidam tuo ro.