Jentelhai laia rongbawltu Paula
3
1 Hi thil lei hin kei Paula, nangni Jentelhai ta dinga Krista Isu-a mi intâng hin ka trongtraipek chêu a nih. 2 A lungsietna leia Pathienin nangni enkoltu nina sin thaw dinga a mi ruot thu kha lo hre ta ngĕi in ta. 3 Khânga inlărnaa Krista thurŭk inhriettira ka um thu chu kha hma khan tawite ka hung ziek tah a. 4 Ka thu ziek kha in tiem ngun chun, chu Krista thu ril chu ka hriet chiengzie khom hre thei in tih. 5 Pathien tirko le zawlnei thienghlimhai kuoma Thlarauin tuta a’n hriettir ang tluk hin khâ hmâ khan hi thu ril hi mihriemhai kuomah a la’n hriettir ngai nawh. 6 Chu thurûk chu, Chanchin Thra leiin Krista Isu-a chun Jentelhai le Israelhai hi ro hluo tlâng ding dăm, pum khat le sûng khata um ding dăm le thutiem dong tlăng ding dăm ei ni thû a nih. 7 A thilthawtheina hmangin Pathienin a lunginsietna thilpêk a mi’n dongtir a, chu Chanchin Thra rongbawltua chun a mi siem a. 8 Kei hi mi thienghlim po po laia chîn tak ni lang khom, Jentelhai kuoma Krista hausakna sui suok ruol lo chu puong dingin a lunginsietnan a mi ruot a; 9 iengkim siemtu Pathien kuoma chatuona inthoka thurûk um, a remruot lawk chu, mi po po kuoma suklang ding le, 10 kohran hmanga Pathien varna inthŭkzie van hmuna lalhai le thuneituhai inhriettir dinga ruot ka nih. 11 Chatuona inthoka rem a lo ruot ngĕi chu ei Lalpa Isu Kristaah a hung hlen suok a. 12 Krista ei ringna leiin nêl tak le ngam takin Pathien ei hnai thei tah a nih. 13 Chuleiin, a ta dinga ka tuornahai leia zâm lo dingin ka ngĕn chêu, in ropuina ding vong a ni si a.
Krista hmangaina hriet
14 Hi lei hin ei Lalpa Isu Krista Pa hmaah dingthrathruonin ka kûn hlak. 15 Ama chu hnuoi le văna ringtu sungkuo tinrêng hming lăkna a nih. 16 A thlarau zărah in sungril tieng thà sukhrâtna dingin a ropuina nasa taka inthoka thilthawtheina chu pe sien la chêu, 17 ringna leiin Krista chu in lungrilah chêng raw se. Hmangainaah zung keia in hung nghet theina dingin ka trongtraipek chêu. 18 Chun, mi thienghlim po pohai leh Krista hmangaina lienzie dam, seizie dam, insangzie dam le inthûkzie dam in hung hriet theina ding le 19 chu hmangaina, hrietna po po khoma a hriet seng ruol lo chu hre a, Pathien famkimna tinrênga sung sip in hung ni theina dingin, ka trongtraipek bok chêu.