Thǐnaa inthoka hringna
2
1 Kha hma khan chu in bawsietnahai le in suolhai leia thi in ni kha. 2 Chuong lai chun hi khawvel zie ang hin in khawsa a, boruoka thuneitu lal, awinawhai chunga tu chena thok zing thlarau thû thŭin in um hlak. 3 Anni lai chun eini khom ei lo thrang ve vong a, ei tisa chăkzawng inhoitirna hnotin, ei tisa nuomzawng le ngaituozawng ei thaw hlak a, mi danghai ang bokin Pathien lungsenna tuor ding hrima pieng ei nih. 4 Nisienlakhom, zangainaa sip Pathien chun lunginsietna a hau ĕm leiin, 5 ei bawsietna leia thî ei ni lai khan Kristaah a mi sukhring a; a lunginsietna zăra sandam in nih. 6 Pathien chun Krista leh a mi keitho a, van hmunahai khin ama leh a mi’n thrungtir a. 7 Ei chunga a zangaina Krista Isua a’n langtir hin hun la hung tlung pei dinga khom lunginsietna hril seng ruol lo a hauzie a hung suklang a nih. 8 Lunginsietna zăra ringnaa sandam in nih, chu chu nangni thaw suok a ni naw a, Pathien thilthlâwnpĕk a nih.a 9 Thilthaw lei a ni nawh, ni sien chu miin uongpui an tih. 10 Ei um dan dinga Pathienin a buotsai lăwk anga, thil thra thaw dinga Krista Isu-a siem, Pathien kutsuok ei nih.Kristaa pumkhata siem
11 Chuleiin, nangni piengnaa Jentelhai, mihriem kut hmanga sertanhaiin ‘Sertan nawhai’ an ti hlak chêu kha hre zing ro; 12 khâng lai khan Krista in la nei naw a, Israel sungkuo lakah hnam hrang in ni a, Pathien thutiem thuthlung puoah in um a, hi khawvela hin beiseina hrim nei lo le Pathien khom nei lo in ni hlak kha hre zing bok ro. 13 Tu ruok hin chu nangni, kha hmaa hla taka um hlakhai kha Krista thisen leiin Krista Isua chun sukhnaiin in um tah. 14 Krista chu ei inremna a nih. Ama taksa ngei chun Jentelhai le eini Judahai hi pumkhatah a mi siem a, ei indăidànna le intaina bang chu a thriek a. 15 Dan thupêkhai le a bèbàwmhai chu a hung sukbo a, keini le nangnihai chu amaa chun mihriem thar, pumkhatah a mi siem a, inremna a hung intlun a. 16 Kraws-a chun intaina chu a sukbo a, Jentelhai le Judahai chu pumkhata hung umin Pathien leh ei lo inrem tah a. 17 A hung khan hla lema um nangnihai kuomah inremna Chanchin Thra a hril a, a hnăi lema um keinihai kuoma khom inremna Chanchin Thra bok chu a hril a. 18 Ama zârah Thlarau hmun khatin Pa kuom ei tlung tlăng thei tah a nih.
19 Chuongchun, tu hin chu ram dang mi le mikhuol châmbâng el in ni ta naw a, mi thienghlimhai leh tuolkhat, Pathien sungkuo ei ni ta lem. 20 Tirkohai le zawlneihai lungphŭm rem chunga băwl in na, chu lungphŭma a dotu lung poimaw tak chu Krista Isu a nih. 21 Chu in pumpui chu amaa chun rem khawm a na, Lalpa ta dinga Tempul thienghlim a hung ni tah. 22 Nangni khom amaa chun Thlaraua Pathien chêngna in dinga mi danghai le rem khawm in nih.