2 Pathien, ei Pa le Lalpa Isu Krista kuoma inthoka lunginsietna le inremna chu in kuomah um raw se.

3 Ei Lalpa Isu Krista Pathien le Pa chu inpâkin um raw se. Ama chun van hmuna thlarau malsawmna tinrêngin Kristaah mal a mi sawm a. 4 Thienghlim le soisĕl boa a hmaah ei um theina dingin leilung insieng hma khan Kristaah a mi lo thlang a. 5 A ditzawng le tum dan ang takin Krista Isu zăra a nau ni dingin hmangainain a mi lo ruot lâwk bok a. 6 A hmangai le a Dittak zara a lunginsietna ropui a thlăwna a mi pĕk leiin inpâk ei tiu. 7 Lunginsietna a hau angin, Krista thisen chun a mi’n tlan a, ei suolhai a ngaidam a, 8 chu lunginsietna chu var tak le rem hre takin ei chungah a vŭr ta treu a. 9 Kristaa a lo ruot lawk ang taka ama ditzawng anga thaw a tum thurûk chu a mi’n hriettir a. 10 Hun a kim phaa Kristaa hlen dinga a thil rêl lawk chu van le hnuoia thil iengkim chu lu pakhat, Krista hnuoia hŭi khâwm vong a nih.

11 Ama remruot dàn le dit dàn ang taka thil iengkim hlentuin a mi lo ruot lawk angin, Krista zărah rohluotu nǐna ei chang a. 12 Eini Kristaa beiseina innghat hmasatuhai hi a ropuina chawimawitu ding ei nih. 13 Thutak, in sandamna Chanchin Thra chu in lo hriet a, in lo ring tah a, a tiem Thlarau Thienghlim suoi chun nangni khom Amaa chun a’n chik tah chêu a nih. 14 Chu chu Pathien mi ni dinga a mi’n tlan leia ei rochan ding zakhamna chu a nih. A ropuina chu inpâkin um raw se.

15 Lalpa Isu in ringzie le mi thienghlimhai po po in hmangaizie kei khomin ka lo hrietin, 16 ka trongtrainaah ka hriet zing hlak chêu a, in ta dingin lawmthu hril ka ma nawh. 17 Ama in hung hriet chieng zuol theina dingin ei Lalpa Isu Krista Pathien, ropuina Pa chun varna le hrietthiemna thlarau pe raw se cheu. 18 Chuongchun, in lungril mithai sunvara um a, ieng am beisei dingin a ko chêu ti hai, mi thienghlimhai rochan ropuizie le hnienghnarzie hai, 19 a hrătna thahrui thilthawtheina tawp chin nei lo chun eini ringtuhaia a thaw nasatzie dam in hung hriet theina dingin ka trongtrai hlak. 20 Chu hrâtna chun Krista chu mithi laia inthokin a keitho a, van hmunahai khin a chang tieng a’n thrungtir a; 21 lalna hai, thuneina hai, thilthawtheina hai, rorêlna po pohai chunga le tu lai le hun la hung tlung dinga nǐna hming po po chung daiah a sie tah a nih. 22 A ke hnuoiah iengkim Pathienin a sie a, kohran ta dinga iengkima Lû takah a ruot a. 23 Kohran chu Krista taksa a nih, iengkim kong tinrênga sungsiptu famkimna chu.