Phurrik insawk tonin
6
1 Unauhai, miin suol a thaw lai in phăwk pal chun, nangni thlarau mihai chun chu mi chu indoi takin tungding nawk tum hlak ro. Nangni khom invêng thra seng ro, thlĕmna tuok ve hlauh rawi in tih. 2 In phurrikhai insawk tuo hlak ro, chuongchun Krista dan in zăwm ni’ng a tih.3 Ieng khom ni bar si loa mi lien tak nia inngai chun ama a’n hlĕm fawm a nih. 4 Mi tinin mani thilthaw inen fie lem sien, mi dang leh inkhi naw sien, in thaw tâwk peiah lawmna ding nei thei in tih. 5 Mi tinin mani phur seng ei phur ding a nih.
6 Zirtirna thu dongtu chun a zirtirtu chu thil thra a nei ang ang pe ve raw se. 7 Hlĕmin um naw ro. Pathien chu nuisaw chi a ni nawh. Mi tinin a tù ang char a sîk hlak. 8 Mani tisa chăkna suklawmna dinga suol tùtú chun sietna sîk a ta; Thlarau lawmna tieng chi tùtú ruok chun Thlarau tienga chatuon hringna sîk a tih. 9 Thil thra thaw hi nghok nawng ei tiu, ei inthlàdà naw chun a hun takah ei la sìk ding a ni si a. 10 Chuongchun, remchâng ei hmu taphotah mi tin kuomah thil thra thaw inla, ringnaa ei sunghai chunga lem chu uor nawkzuolin thawng ei tiu.
Infŭina le chibai bûkna
11 En ta u, hawrop inhrol phura ziek hi keia kut ziek ngei a ni hi. 12 Tisa tienga a langa insukmawi tumhai chun Krista kraws leia sukdŭdăna an tuor ding chu pumpelna dingin ser intan luitir chêu an tum a. 13 Sertanhai khom hin Dan chu an zawm kim bik chuong nawh. In taksaa inchikna um chu an uongpui theina dingin ser intantir chêu an tum a ni kha.
14 Kei ruok chun ei Lalpa Isu Krista kraws chauh naw chu uongpui ding hrim ka nei nawh. Chu kraws-ah chun ka lakah khawvel hi hemde a ni tah a, kei khom khawvel lakah hemde ka ni tah. 15 Miin ser a tan le tan nawin thu a phur nawh, siemtharna hi a poimaw tak chu a nih. 16 Hi thu zawmtu po po chungah inremna le zangaina tlung raw se, Pathien Israelhai chunga khom.
17 A tawp taka chun, ka taksaa hin Krista inchikna ka put ta si leiin tuta inthok chu tu khomin mi sukbuoi ta naw raw hai se.
18 Unauhai, ei Lalpa Isu Krista lungsietna chu in kuomah um raw se. Amen.