Jerusalem inkhawmpui
2
1 Kum sawmpali hnungin Barnaba leh Jerusalemah ka hang fe nawk a, Tita ka thruoi bok a. 2 Pathien inhriettirna leia hang fe ka nih, Jentelhai laia Chanchin Thra ka hril hlak thu chu an hmaa hang tar lang dingin. Ka rongbawlna chu ka sawl thlawnpui el nawna dingin hotu lien deua an hrilhai chu a fâlin ka’n hmupui tawl a. 3 Ka mi thruoi Tita chu Grik mi ni sien khom ser intan luitir an tum chuong nawh. 4 Isu Kristaa zalenna ei nei enthla dinga an ni laia enthlatu inzep rûkhai ruok chun an suokah mi hrĕn an tum a. 5 Amiruokchu, Chanchin Thra thutak chu in ta dinga hum a ni tlat theina dingin mit khap kâr tè khom ngirhmun kan intawl hrim hrim nawh. 6 Mi challang deua inlang (a tu khom ni hai sien ka ta dingin a danglam chuong nawh, Pathienin tu khom a en dang naw leiin), chuong mi poimawhai chun ka chungthuah ieng khom hril sap ding chuong an nei nawh. 7 Nei nêk hmanin Peter chu Judahai laia Chanchin Thra hril sin inkoltir a ni ang bokin Jentelhai kuoma Chanchin Thra hril sin chu ka kuoma inkoltir a nih ti an hmu a. 8 Juda sertanhai laia tirko ni dinga Peter dàndètu chun sertan lo Jentelhai laia tirko ni dingin a mi dàndè a nih.
9 Chuongchun, kohran bana an ngai tak Jakob hai, Peter hai le Johan hai khomin lunginsietna ka dongzie an hmuin, keinin Jentelhai lai rong bawl a, annin sertanhai lai rong bawl dingin Barnaba le kei chu inpawlna kut chang tieng an mi’n hlăn ta lem a nih. 10 Anni laia mi retheihai ruok chu hre zing dingin thu an mi’n cha a, chu chu thaw kan lo tum sa hrim a ni si a.
Paulan Peter a kawk
11 Chun, Peter chu Antiokeia a hung khan a thaw indik naw leiin hmaisanah ka kal a. 12 Jentelhai ser intantir tuma Jakob kuoma inthoka mi threnkhat an hung hmâ chun Jentelhai lai bu a fâk hlak a. An hung tlung phing leh sertan pawlhai chu a tri leiin a’n kei tǐm a, Jentelhai laka chun a’n thier fihlim ta dai a. 13 Juda danghai khom chun a lêmderna chu an lo thlop a, Barnaba chen khom an lo thruoi kăwi hman hiel a.
14 An thil thaw dan chu Chanchin Thra thutak leh a’n hmè nawh ti ka hmuin, an rênga hmaah hieng hin Peter chu ka hril a: “Nang Juda i na, Juda anga um loin Jentelhai angin i hang khawsa a, chuong sà khom chun ieng leia Jentelhai chu Juda mi anga inumtir i tum?
15 Eini chu ‘Jentel mi suol’ an ti hlak hai ang ni loa Juda mi hrima pieng ei nih. 16 Amiruokchu, miin Dan a zawm lei ni loin, Isu Krista a ring lei lemin Pathien hmaah thiem a chang thei chauh ti ei hriet; Dan zawm lei ni loa Krista ringtu ni leia Pathien hmaa thiem ei chang theina dingin eini ngei khomin Kristaa chun ringna ei innghat a nih. Dan zawm leiin tu khomin Pathien hmaah thiem a chang thei si nawh.
17 Krista ringtu ei ni leia Pathien hmaa thiem chang tum einihai hi ‘Jentel mi suolhai’ ang chiea ngai ei ni si chun, Krista-in suol rong a bawl tina am a ni ding? Teu lo e! 18 Ka lo thriek tah Dan bok inngǐr thar nawk ka tum si chun a bawsetu ka nih ti a chieng. 19 Kei chun Dan fe thlengin Dan chu ka thisan ta a; Pathien tieng ka hring theina dingin, Krista kuomah kraws-a hemde ka ni tah. 20 Keima nun pangngaia hring ka ni ta naw a, Krista chu keimaah a hring ta lem a nih. Tuta taksaa ka hring hi mi hmangaia ka ta dinga hringna petu Pathien Naupa ringa hring ka nih. 21 Pathien lunginsietna hi hnawl ka tum nawh. Dan zăwm leia thiem chang thei a ni chun Krista thǐna hi a thlâwn el ning a tih” tiin.