GALATI
Chibai bûkna
1
1 Kei Paula, mihriem tir ni lo, mihriem zâr khom ni lo, Isu Krista le mithi laia inthoka ama keithotu Pa Pathien ruot hin, 2 kan kuoma unau umhai po po leh hin Galati rama kohranhai chibai kan bŭk chêu.3 Pathien ei Pa le Lalpa Isu Krista kuoma inthoka lunginsietna le inremna chu in kuomah um raw se. 4 Ei Pa Pathien ditzawng chu zawmin tu lai hun thra naw taka inthoka mi san suok ding le ei suolhai mi sâwp faipek dingin ama Krista ngĕi chu a lo inpĕk ta si a. 5 Pathien kuomah ropuina chatuonin um raw se. Amen
Chanchin Thra dang a um nawh
6 Krista lunginsietnaa kotu chĕu kha maksana ‘chanchin thra’ chi dang tieng in pakai thut el hi mak ka ti a nih! 7 Chanchin Thra chi dang a um naw a, nangni sukbuoi tumtuhaiin Krista Chanchin Thra an her kawi lei chauh a nih ti a chieng. 8 Keini khom ni inlang, vana inthoka hung trum vantirkohai khom ni sien, kan hril ta sa ni lo Chanchin Thra dang hrim hrim hung hriltu chu trongsephurin um raw se. 9 Ka hril tah chêu ang khan tu hin ka hril nawk chêu a nih: tu khom Chanchin Thra in pom tah ti lo a dang hriltu chêu chu chatuonin trongsephurin um mol raw se.
10 Mihriem tlon lungawi am ka tum Pathien lem? An naw leh, mihriem lawm zawng hril tumin ka’n lang hrím hrìm am a ni? Mihriem suklawm tum ni lang chu Krista siehlaw ni naw ning.
Pathien ko tirko
11 Unauhai, Chanchin Thra ka hril chêu kha mihriem thu phuokfawm a ni nawh ti in hriet ka nuom. 12 Mihriem kuoma inthoka ka dong a ni naw a, tu khomin an mi’n chŭktir bok nawh; Isu Krista ngeiin ka kuoma a puong a ni lem.
13 Juda mi fǐr ka ni laia ka um dan kha in hriet, khânga râwng taka Pathien kohran suknomnaa răwt chimit ka tum hlakzie hai kha. 14 Kan thlatuhai thurosie vong chungchangah ka ruolpui Judahai lai chu a kûl a tâia thrahnem ngai bǐk le chu konga Judahai laia a turû tak ka ni hlak a. 15 Nisienlakhom, Pathien chun ka nu sula ka um laia inthokin a mi’n ser hrang a, a lunginsietnain a mi ko a. 16 Jentelhai lai a Chanchin Thra ka hril theina dinga a Naupa ka kuoma a hung inlărtir lai khan mi dang tu khom ka’n răwnpui nawh. 17 Tirko ka ni hmaa tirko lo ni tah, Jerusalema umhai kuomah ka hang fé bok nawh. Arabia ramah ka fé nghăl a, chu taka inthok chun Damaskaah ka hung kǐr nâwk chauh lem a nih.
18 Chun, kum thum a’n voi hnungin Petera inhmêlhrietpui dingin Jerusalemah ka hang fe a, a kuomah ni sawmpanga ka châm a. 19 Lalpa unau Jakob ti chauh naw chu tirko dang tu khom ka’n hmupui nawh. 20 Ka thu ziekhai hi a’n dik, Pathien hmaah khêl ka hril nawh. 21 Chu hnung chun Suria ram le Kiliki ram ka sir a. 22 Judai rama Kristaa kohranhai lem chun mi mal takin an mi la hmĕl hriet tawl nawh. 23 “Kha hmaa mi suknomnatu khan nuoi chimit a tum ringna thu a hril ve tah” ti mi hril ruok chu an lo hriet a. 24 Keima leiin Pathien an inpăk a.