Zilna le chibai bûkna
13
1 Tu hi in kuoma ka hung voi thumna ding a nih. ‘Thuhretu pahni amanih pathum amanih baua inthok chauin thubuoi hrim hrim chu sukfel chau ding a nih’ ti a na. 2 In kuoma ka hung voi hninaa khan thilsuol thawtuhai le mi dang po po kuomah ka hril tah a, nangni lai um hri naw lang khom ka hril nawk chêu a nih: ka hung pha chu thilsuol thawtuhai chu hlà naw ning. 3 Keima ngei mi hmangin Kristan thu a hril ti fie in tum chu la hmung in tih. Nangni lai chău taka thil thaw loin, nasa takin Kristan thil a thaw lem hlak kha. 4 Ama chu hrat nawnaa hemdein a um a, sienkhom Pathien thilthawtheina leiin a hring a nih. Keini khom amaa chun hrat naw inlang khom, in ta dinga rong kan bawlnaah Pathien thilthawtheina leiin amaa chun kan hring a nih. 5 Ringnaah in um le um naw inen chiengin, mani ngei infie hlak ro. Krista Isu chu nangniah a um ti hrietna in nei am? Inhrietna in nei naw chun a lem chauh in la nih. 6 Keini ruok chu ringnaah kan um ngei a nih ti in hung hriet chieng pei ka beisei. 7 Thil thra lo in thaw nawna dingin Pathien kuomah kan trongtraipek hlak chêu a, chu chu kan hlawtlingzie tar langna ding ni loin, hlawsam anga kan inlang khoma nangni bĕkin thil thra in thaw theina dinga kan hnipek chêu a nih. 8 Thutak do zawngin ieng khom kan thaw thei naw a, thutak ta ding chauin a nih kan thaw thei. 9 Keini kan hràt naw chàng khoma nangni in hrât phot chun kan lawm. In thrat famkimna dingin kan hni rop hlak. 10 Sukse ding cheu ni loa siem thra ding chêuin Lalpan thuneina a mi pĕk a, in kuoma ka hung pha leh chu thuneina chu ka vilik rak a trûl nawna dingin ka hung hmain hieng thu hi ka hung ziek a nih.
11 A tâwp taka chun unauhai, dam takin um ro. Famkimna hnot unla, ka ngĕnna chĕu hi poisa unla, lungril hmun khat put unla, inrem takin um ro; chuongchun, hmangaina le inremna Pathien chun umpui a ti chêu. 12 Fawp thienghlimin chibai inbûk ro. 13 Mi thienghlimhai po po hin chibai an bŭk chêu.
14 Lalpa Isu Krista lunginsietna hai, Pathien hmangaina hai, Thlarau Thienghlim pawlna hai chu in rênga kuomah um raw se.