Inlârna le thupuong
12
1 A hlawkna a um nawa chu hang uong zui pei ka tih. Ka kuoma Lalpa inlârna le a thupuong hang hril ka tih. 2 Kum sawmpali liem tah khan, Kristaa um mi pakhat ka hriet chu van thumnaah thruoi tungin a um a, a hringhrănin amani ruok chu ka hriet nawh, Pathienin a hriet. 3 Chu mi ngei chu Paradis-a lăk tungin a um a, a takin am an naw leh zêlin a um ti khom ka hriet nawh, Pathienin a hriet. 4 Chu mi chun thil hril thei ruol lo le mihriemhai hril thieng lo a hriet. 5 Chuong ang mi chu uongpui ka tih; keimaa ruok chu uongpui ding ka hriet nawh, ka hrat nawna chauh naw chu. 6 Uong nuom khom lo ni hrim lang, thutak ka hril ding a ni leiin thil invĕtthlak ni naw nih. Nisienlakhom, insûm ka tih, chuong naw chun miin ka thilthaw an hmu le ka hril an hriet nêka nasain kei mi ngai ropui lem hlauh rawi an tih. 7 Thil inhriettira ka um chu a ropui êm leia ka’n ngaihlu talaw nawna dingin ka taksa puma hin hling pĕkin ka um a, chu chu Setan tirtawn, mi sun zingtu chu a nih. 8 Chu chu mi la hmangpek dingin voi thum Lalpa ka hni a. 9 Ama chun, “Ka lunginsietna hi i ta dingin a huntawk; ka thilthawtheina hi hrat nawnaa inthokin annawm sukfamkima a um hlak chu” a mi ti a. Chuleiin, Krista thilthawtheina chu keimaah a chêng theina dingin ka hrat nawna hi lawm takin ka uongpui ta lem a nih. 10 Krista leiin hratnawnaa hai, chêksolnaa hai, harsatnaa hai, sukdŭdănaa hai le sietnaa hai ka lawm hlak. Ka hrât naw pha leh ka hrât chauh hlak a nih.
Paulan Korinth khuo a’n voizie
11 Ka’n vêt zo an ta hi, nangnin lo thei loah in mi siem si a. Nangni hi mi hril mawitu lem ding ni awm tak in na. Ieng ni naw lang khom, ‘tirko lien’ intihai hi ieng konga khom ka tluk naw bik nawh. 12 Nangni lai kong iengkimah dawthei takin inchikna thilmakhai le entirna danghai thawin tirko ka nizie ka tar lang hlak a. 13 Ieng konga khom ka sukkhawk ngai naw chêu ti ngot naw chu kohran dang neka ka ngainêp lemna cheu iem a um a? Ka lo thaw indik naw a ni chun mi ngaidam ro.
14 Ngai ta u, tu hi in kuoma hung dinga ka’n siem voi thumna a ni tah. Nangni ta dinga phurrik ni ka tum naw a, in thil nei ka ngiet naw a, nangni a nih ka dit chu. Nauhaiin nu le pa ta dingin an inkhawlpek ngai naw a, nu le pahaiin nauhai ta dingin an inkhawlpek lem hlak. 15 Kei chu in thlarau ta dingin lawm takin inhmang zo ka ta, inpe zo thrak ka tih. A chuongliema ka hmangai cheu leiin in mi hmangai nêp sot dim a ni? 16 In mi’n khawkpui naw chu thukhat ni ta sien, dawha vervek hmanga ka simbu dawi cheu anga lo hril thang pawl dam maw in um chu? 17 Nangni laia ka hung tirhai amani bek hmangin nangnia inthokin hlawkna ka hmu am a ni? 18 In kuoma hung dingin Tita ka ngĕn a, ama ruolin unau pakhat ka hung tir bok a, Tita chun hlawk phanain a hmang chêu am a ni? Lungril hmunkhat puta rongbawl le lampui thuhmun hrawa kal chawi tlâng kan ni nawm a ni?
19 Kha hma po po khan mani inhril mawiah in mi lo ngai zing a ni maw? Pathien mit hmuin Kristan hril dinga a ti thu chu kan hril hlak. Dittakhai, iengkim hi nangni sukhrătna dinga kan thaw a nih. 20 Ka hung pha leh ka tum angin hmu nawn’g ka ti chêu a, nangni khomin in tum angin mi hmu naw’ng in tih ti hi ka thil inlàu a nih. Inhalna dam, inthîkna dam, lungsen inhrawtna dam, pawla inthrèna dam, inhril sietna dam, indemna dam, chapona dam le buoina dam hung hmu ka’n lâu bakah, 21 ka hung nawk phâ leh, tuta hmaa thil suol le tirdakum in thaw hlak inngainahai le in chêt pornahaia inthoka la sim si lo mi tam tak leiin trap pal ka ta, ka Pathienin in hmaah mi sukmuolpho hlauh rawi a tih ti ka’n lâu bok a nih.