Paulan soiseltuhai a khak
10
1 Kei Paula, ‘hmai sana chu pa awm nêm tak, ral kânga chu pa awm khau tak’ in ti ngei hin Krista thuhnuoirolna le nunnemna sâlin ka ngĕn chêu. 2 Tisa mi tak anga khawsaa mi hriltuhai lakah ka khauh ngam dingzie ka hriet si a, ka hung phaa chuong anga ka um a trûl nawna dingin ka ngĕn chêu a nih. 3 Khawvela khawsa ni inla khom khawvel do dan angin râl kan do ve nawh. 4 Indona hriemhrei kan hmanghai hi khawvel ralthuom a ni naw a, kulpui thriek theina Pathien ralthuom thilthawthei chu a ni lem. 5 An thranghmun kan thriekpêk pei a, Pathien hrietna lampui, chapo taka dodâltu taphot kan tukdol a, ngaituona tinrêng Krista salah kan man bok a nih. 6 Thu in awi zăn pha leh a la awi nawhai chu hrem dingin kan inpei zing a nih.7 Puo tieng inlang dan ringotin thil in thlîr a. Tu khom Krista tà ni bîka insie dam an um chun inngaituo non raw se; Krista ta a ni ang bokin keini khom kan ni ve. 8 In sietna ding ni lo, nangni tungdingna dinga Lalpan thuneina a mi pĕk hi ka lo uongpui taluo khom a ni thei a, sienkhom ka’n zàpui nawh. 9 Lekhathona nangni inthri tum angah mi ngai naw ro. 10 “A lekha thuhai chu a rikin a khau vei leh, ama ei hmu hlak chun pa awm nêm, a thuhril hlak insitum tak a ni bok si” ti tâwk dam in um a. 11 Chuong anga ngaituhai chun hi hi hre raw hai se: in kuoma kan hung hmaa lekhathona ka hung hril ang tak khan ka hung pha chu thawng ka tih.
12 Mani inhril mawi hlakhai lai kan intiem sa ve ngam naw a, anni le inhrilkhi kan nuom bok nawh. Mani inkhǐna dinga bi an thliek fawm chun mani le mani an inkhi a, a va hang invĕtthlâk de aw! 13 Keini chun kan biel huom sŭng bâka mi chu uongpui naw ning ungah, Pathienin ri a mi khampek sunga mi chauh uongpui veng kan tih; chu chun nangni khom a huom sa chêu a nih. 14 Kan biel sunga mi in ni leiin Krista Chanchin Thra in kuoma kan hung intlun khan a khêl tieng kan fe naw kha. 15 Kan biel puo tienga mi dang thaw inrimna kan uongpui nawh. In ringna hung inthranglien a ta, thil ropui lem nangni lai thaw la ni’ng a ta, kan biel khom lien zuol pei a tih ti ruok chu kan beisei. 16 Chuongchun, in ram puo tieng Chanchin Thra chu la hril pei kan tih; nisienlakhom, mi thaw sa chu uongpui naw’ng kan tih. 17 ‘A uong taphot chun Lalpa uongpui raw se’. 18 Mani inhril mawihai ni loin, Lalpan a chawimawihai chauh pom an ni hlak.