Somdawlna thilpêk
9
1 Mi thienghlimhai somdawlna sin hi in kuoma ziek a ngaiin ka hriet nawh. 2 Thrangpui in inpei zing ti ka hriet a, Makedonia mihai kuoma khom suong takin, “Ni kuma inthok ta khan Akaia rama chu an inpuocha tah” tiin ka hril hlak a, in thrahnemngaina chun mi tam tak a chokhar a. 3 Hi thila hin ka’n păk thlawn nawna ding chêuin le ka hril ang ngeia in lo inbuotsai fel theina dingin unauhai hi ka hung tir a nih. 4 Makedonia rama mihai hi keini ruolin hung ve ta hai sien, in la inpei fel nawh ti an hung hmu chun, kan ring ĕm êm vei cheu leh, in ta ding chauh ni loin, kan ta ding khomin inzak a um hlè ding a nih. 5 Thawlawm in intiem ta sahai kha lo sukfel diem dingin unauhai hi hung tir hmasak trûlin ka hriet a; in lo inpei hman tah chun in thilpekhai chu lak lui ang ni loa nangni thu ngeia in pĕk a nih ti inlang chieng a tih.6 Tu khom a tù tlawm chun sîk tlawm a ta, a tù tam chun sîk tam a tih ti hi hre zing ro. 7 Mi tinin mani lungrila tum ang chu inro lo le thawluina ang ni loin pe seng raw se; Pathien chun lawm taka petu a nih a hmangai hlak. 8 Thil thra tinrêng thawna dinga iengkima in burip zingna dingin Pathien chun malsawmna tinrêng hnienghnâr takin a vûr thei chêu a nih:
9 “A sem dar a, pasiehai a pêk a,
A tiktlaina chu kumkhuoin
A pangngai zing a nih”b
ti ziek ang khan.
10 Tù dinga thlai chi petu le fak dinga bu petu chêu chun thlai chi pe treu a ti chêu a, inthrangtir a ta, in felna ra chu sukpung bok a tih. 11 Kong tinrênga tiktlâi hlê dingin sukhausang a ti chêu a, chun, keini hmanga in thilpek lei hin Pathien kuomah lawmthu hril an tih. 12 In somdawlna thilpêk hin mi thienglimhai mamaw a phuhrûkpêk chauh ni loin, Pathien kuoma lawmthu hrilna khom nasa takin sukpung bok a tih. 13 Hi in rongbawlna hin in pom tah Krista Chanchin Thra ta dinga in ringumzie le thu in awizie hai le an ta ding le mi dang po po ta dinga in tiktlaiziehai a suklang a, chu chun Pathien inchawimawitir ngêi a tih. 14 Anni khomin Pathien lunginsietna in dong nasa êm lei hin ditsak takin in ta dingin trongtrai ngei bok an tih. 15 A thilpêk hril seng ruol lo leiin Pathien kuomah lawmthu um raw se.