Tiktlâi dinga infuina
8
1 Unauhai, Makedonia rama kohranhai lungrila Pathienin lunginsietna a’n neitir dan hi kan hril nuom chêu a nih. 2 Rinumna nasa taka fie an ni zing pum khomin an lawmna a luong liem a, rethei mong tol ni siin an tik a tlâi êm êm a. 3 Anni lungril puok suok ngatin, nei thinglung khawngin an pêk a, an tlin baka tam daih an pĕk ti ka hrietpui. 4 Mi thienghlimhai somdawlna ding rongbawlnaa hin thrang ve an hni rak a. 5 Kan lo beisei phak lo zawng daiin, anni ngei chu Lalpa kuomah an inhlân phot a, chu hnungah Pathien dit dan angin kan kuomah an hung inpĕk a. 6 Chuongchun, nangni laia somdawlna thilpêk lak khawmna, kha hmaa in lo tran tah kha hung thaw zopui nghal dingin Tita kan ngĕn a. 7 Ringnaa dam, thuhrila dam, hrietnaa dam, thrahnemngai trûlna tinrênga dam le in mi hmangainaa dam mi in khŭm hlak ang khan, somdawlna thilpêka khom hin mi khûm ngei dingin thrahnem ngai ro.8 Hieng hi thupêk anga ka hung hril an nawh, in hmangaina chu a tak ngei a nizie fiena dinga thilpêk tienga mi danghai thrahnemngaizie thu ka hung hril a nih. 9 Ei Lalpa Isu Krista lunginsietna hauzie chu in hriet a; a retheina leia in hung hausak theina dingin, hausa hle sien khom nangni leiin a hung rethei tah a ni kha. 10 Hi thua hin in ta dinga thraa ka hriet chu hi hi a nih: ni kum khan a thaw hmasa tak chauh khom ni loin a thaw nuom hmasa tak in nih. 11 A tǐra in inhuom ang khan, in nei dan le inphû tawk ang peia pein, tu hin thrahnemngai takin hlen suok ro. 12 Min a nei nâw sà ni loin, pek nuomna lungril neia phal taka a thil neia inthoka a pĕk a ni chun lawm a um.
13 Nangnin rimsi takin mi dang sawk zàngkhai inla kan ti a ni naw a, insawk tuo a trûl thu kan hril a nih. 14 Tu hin nangnin in hau lai hin an tlăksamna in phuhrûkpek a, anni khomin an hau ve hunah in tlăksamna la phuhrŭkpek an ti chêu; chuongchun in insawk tuo ding annawm. 15 ‘A rût tamtu chun a nei tam chuong naw a, a rût tlawmtu chun a tlasam bok nawh’ ti ziek ang khan.
Tita le a ruolhai
16 In ta dinga ka thrahnem ngaina ang Tita lungrila sietu Pathien kuomah lawmthu um raw se. 17 Ama chun ka ngênna a pom el chauh khom ni loin, thrahnem a ngaina lei lemin in kuoma hung a tum a. 18 Ama ruolin unau pakhat ka hung tir sa ve a, ama hi Chanchin Thra hril thuah kohranhai po poin an inpâk hle a. 19 Chu chau khom chu ni loin, Lalpa ropuina dinga thrahnemngai taka hi somdawlna rongbawl sin hi thawa kan inzinpui dinga kohranhaiin an thlang suok a nih. 20 Chuong ang chun, mihaiin phal taka an pêk khawmhai hi kan buoipuinaah dem kâi naw hrăm hrâm kan tum a nih. 21 Lalpa hmua mawi chauh ni loin mihriem hmua mawi khom ei ngaituo bok ding a nih.
22 Chun, kan unaupa khom hi anni ruolin ka hung tir bok a nih. Ama khom hin thrahnem a ngaizie kong tam takah a suklang rop tah a, tu lem hin chu a ring êm chêu leiin hung a châk nawkzuol a. 23 Tita hi ka ruolpa, nangni laia rong mi bawlpuitu a na, kan unauhai khom hi kohranhai palai an na, Krista ropuina an ni hi. 24 Chuleiin, kohranhaiin hmangaina in hauzie an hmu a, kan inpakna chĕu hi a’n dikzie an hriet theina dingin, an chungah in hmangaina lo inlangtir ro.