Pil bêla thlarau ro
4
1 Chuleiin, hi rongbawlna sin hi Pathien lunginsietna zăra dàndè kan ni leiin kan zăm nawh. 2 Zâm nĕk hmanin thil inzapuium, a rûka an thaw hlakhai chu kan hnăwl a; dawha hmanga, Pathien thu indik lo taka hril kan chîng bok nawh. Tlang takin thutak kan tar lang a, Pathien hmaah mi tin sie le thra hrietna mit tlunga um kan tum lem hlak. 3 Chun, kan Chanchin Thra hril hi a chieng naw a ni khomin bohmang mĕkhai ta ding chaua chieng naw ning a tih. 4 Krista chu Pathien angpui ngei a na, sienkhom Krista ropuina Chanchin Thra êng chu an hmu thei nawna dingin tu lai khawvel pathien chun ringnawtuhai lungril mit a sukdel si a. 5 Keini chanchin hril loin, Isu Krista chu Lalpa a ni thu le keini hi Isu zara in siehlawhai kan ni thu kan hril lem hlak. 6 Pathien ropuina, Isu Krista hmĕla hung inlang chu kan hriet chieng theina dingin, “Thimah var hung êng raw se” titu Pathien chun kan lungrilhai hi a sunvar ta si a.7 Nisienlakhom, hi thilthawtheina nasa tak hi keinia inthoka suok ni loin Pathiena inthoka suok a nizie inlang chiengna dingin chu ro chu pil bêlaha kan kol a nih. 8 Sir tina inthoka hnaw chêpin kan um a, sienkhom hneng ter kan ni nawh; chanhaiin kan um a, sienkhom kan beidong nawh; 9 suknomnatin kan um a, sienkhom maksanin kan um nawh; vuok thlukin kan um a, sienkhom sukhlum kan ni nawh. 10 Lalpa Isua hringna chu kan taksaa hin a’n lang theina dingin Isu thǐna khom kan taksaa hin kan put zing a nih. 11 Isu hringna chu ei taksa thi theia hin a’n lang theina dingin eini hring le dama la umhai khom hi Isu leia thi dinga ti ei ni rop a nih. 12 Chuongchun, thinain keiniah sin a thaw laiin nangnia ruok chu hringnain sin a thaw thung a nih.
13 “Ka ring a, chuleiin ka hril a nih” ti ziek ang khan, chuong ang ringna lungril chu putin keini khomin kan ring a, thu kan hril hlak a nih. 14 Chuleiin, mithi laia inthoka Lalpa Isu keithotu chun keini khom Isu leh mi keitho veng a ta, nangnihai leh a kuomah mi’n umtir a tih ti kan hriet. 15 Hieng po po hi in thratna ding a na; chuongchun, Pathien lunginsietna chu mi tam tak lai sukpunga a um pei ruolin, Pathien ropuina dingin lawmthu hrilna khom nasa takin luong liem a tih.
Siem thar nun
16 Chuleiin, kan zăm nawh. Puo tieng taksa hi zûr tiel tiel sien khom kan sŭng tieng nun ruok chu a ni têlin siem tharin a um pei lem a nih. 17 Sawt naw te sunga kan rinum tuor nêp tak hin bŭk khi ruol lo chatuon ropuina chang dingin a mi buotsai a. 18 Chuleiin, hmu thei thil thlir loin, hmu thei lo thil chu kan thlir lem a nih. Hmu thei thil chu bo el ding a na, hmu thei lo thil ruok chu chatuona ding a nih.