Thuthlung thara rongbawltuhai
3
1 Mani inhril mawi ei thaw nawk an ta maw? An naw leh, mi danghai ang bokin rikawmenna lekha kan hung chawi amanih, nangnia inthokin chu chu kan lâk amanih a ngai ta hiel a ni maw? 2 Nangni hi kan lekha, mi tin hriet le tiem dinga kan lungril phĕka ziek chu in nih. 3 Nangni hi Krista lekha, keini a mi’n ziektir, lekhatuia ziek ni lo, Pathien hring Thlaraua ziek, lung phêka ziek ni lo, mihriem lungril phêka ziek chu in nih ti a chieng. 4 Chuong ang khop chun Krista zarin Pathien hmaah kan inring zo a nih. 5 Keini ngot chun kan tlin naw a, keini thaw anga hang hril ding ieng khom a um bok nawh; kan tlinna chu Pathiena inthok a ni lem. 6 Ama chun Thuthlung Thar rongbawltu ni tlâkah a mi siem a, chu chu Dan, hawropa ziek ang kha ni loin Thuthlung Thar, Thlaraua ziek chu a ni lem. Dan, hawropa ziek chun thǐna a’n tlungtir a, Thlarau ruok chun hringna a pêk.
7 Mosie hmĕl ĕng, chuoi nawk el ding hman Israel nauhaiin an en zing ngam naw hiel khopin a ropui a, lunga hawropa ziek, thǐna intluntu rongbawlna hman khâng khopa ropui a ni chun, 8 Thlarau rongbawlna lem chu nasa takin a ropui zuol naw dim a ni? 9 Thiemnaw inchangtirna rongbawlna hman a ropui chun, thiem inchangtirna rongbawlna lem chu a va hang ropui ding ngei de! 10 Chu konga chun, ropui tak kha a nêka ropui lem daih a lo um tah leiin a ropui zing ta nawh. 11 Chuoi nawk el hman chuong ang khopa ropui a ni chun, chuoi ta lo ding ropuina chu a va nasa awm ngei de!
12 Chuleiin, chuong ang beiseina chu kan nei leiin kan huoi a nih. 13 Mosie hmĕl ĕng a chuoi chena Israel nauhaiin an en zing nawna dinga a hmai a’n khum ang khan keini chun kan thaw ve nawh. 14 An lungril sukchololin a um a, voisun chen khom hin Thuthlung Hlui bu an tiem châng po leh chu hmai inkhumna chun an lungril a la’n khum zing a nih. Hăwkpêk an la ni hri nawh; chu inkhumna hâwk theitu chu Kristaa chauh a ni si a. 15 Tu chen khom hin Mosie lekhabu an tiem chăngin chu inkhumna chun an lungril a la’n khum zing a nih. 16 Nisienlakhom, Lalpa tieng tu khom a ngha pha, chu inkhumna chu hăwkpêk a ni chauh hlak.
17 Lalpa chu Thlarau a na, Lalpa Thlarau umna taphotah zalenna a um hlak. 18 Chuongchun, eini hmai inkhum ve lohai hi Lalpa ropuizie tar langna darthlalang chu ei ni a, ropuinaa inthoka ropui zuol pei dinga ama angpuia siem danglam pei ei nih. Chu chu Lalpaa inthoka hung um a na, ama chu Thlarau a nih.