2
1 Chuleiin, in lungril sukna ding chun in kuomah hung ta naw el lang tiin lungril ka siem a. 2 In lungril ka sukna chun, nangni ka suknathai bok naw chu mi suklawmtu ding tu dang am an um a? 3 Ka hung phaa mi suklawmtu ding haiin ka lung in suknat nawna dingin kha lekha kha ka hung thon chêu a ni kha. Ka lawmna chu nangni khomin in mi lawmpui seng ka ring tlat a nih. 4 Mitthli tam tak sêngin, lungril beidong le rinum ti pumin, in lung suknatna ding ni loin, ka hmangaina chêu inthukzie in hriet theina dingin, ka hung ziek a ni kha.
Bawsetuhai ngaidamna
5 Lungngaina intluntu chun kei chauh a mi suklungngai naw a, iemani chenah in rêngin a suklungngai chêu a nih ti inla ka uor taluo ni kher naw nih. 6 Mi tam lemin hienga ama in hrem hi a huntawk. 7 Tu hin chu lunginsietin thlamuong ta lem ro, chuong naw chun lungngaina tuor ruol loin tlâkbuok hlauh rawi a tih. 8 Chuleiin, ama chu in hmangai takzetzie inlangtir dingin ka ngĕn cheu. 9 Kong tinrêngah thu awiin fie in dawl am ti hrietna dingin lekha kha ka hung thon chêu a ni kha. 10 Tu khom in ngaidam taphot chu kei khomin ka ngaidam ve. Ngaidamna ding a um a, ka lo ngaidam tah chu nangni leia Krista mit hmua ka ngaidam a nih, 11 chuong naw chun Setanin mi tlâkkhal rawi a tih, a dawha chu ei inhmai si naw a.
Troas khuoa Paula beidongna
12 Krista Chanchin Thra hril dinga Troas ka tlung khan Lalpan rongbawlna lampui a mi hongpek a. 13 Sienkhom ka unaupa Tita ka hmu naw leiin ka bei a dong hle a. Chuongchun anni chu chibai ka bûk a, Makedonia ramah ka fesan tah a nih.
Krista zara hnèna
14 Nisienlakhom, Kristaa a hnèna lampuia mi thruoi roptu le keini hmanga ama hrietna rimtui hmun tina thèdartu Pathien kuoma chun lawmthu um raw se. 15 Keini hi bohmang mĕkhai le sandam mĕkhai laia Pathien ta dinga Krista rimtui chu kan nih. 16 Bohmang mĕkhai ta ding ruok chun thǐna rimsie kan ni a, sandam mekhai ta ding ruok chun hringna rimtui kan nih. Chu sin chu tuin am tlin zo a ta? 17 Mi tam takin sumdawngnaa Pathien thu an hmang ang hin kan hmang ve nawh. Chu nêk hmanin, Pathien mi tir angin, Pathien mit hmuah Kristaa chun titakzetin thu kan hril lem hlak.