2 Pathien, ei Pa le Lalpa Isu Krista kuoma inthoka lunginsietna le inremna chu in kuomah um raw se.

3 Ei Lalpa Isu Krista Pa le Pathien, lunginsietnaa sip Pa, thlamuongna petu Pathien chu inpâkin um raw se. 4 Pathiena inthoka thlamuongna ei dong chu hmanga harsatna tinrêng tuortuhai ei thlamuong ve theina dingin Ama chun ei harsatna po poah a mi thlamuong hlak. 5 Krista tuornahai chu ei nunah ei tuor rawn po leh ei thlamuongna khom Krista zarin a pung hlak. 6 Rinum kan tuor chun in thlamuongna le in sandamna ding a na; thlamuonga kan um chun nangni thlamuongna ding bok a nih, rinum kan lo tuor tah ang chu sel tak le thlamuong taka in tuor ve theina dingin. 7 Rinum mi tuorpuitu in ni angin thlamuongna mi’n trawmpuitu ding in nih ti kan hriet leiin in chungah beiseina nghet tak kan nei.

8 Unauhai, Asia rama harsatna kan tuokhai kha in hriet naw kan nuom nawh; khâng khopa tuor zo ruol lo phur rikin mi del a, dam hrim khom kan inbeisei ta naw hiel thuhai kha. 9 Kan lungril tak chun thi ngei dingin kan inngai a. Sienkhom chu thil chu keiniah ni loin mithi keithotu Pathiena mi’n nghattirtu a lo ni tah lem hlauh a nih. 10 Chuong ang thi el theina tri-um laka inthok chun a mi san suok a; ama chun mi la san suok nawk pei a tih ti hi kan beisei innghatna a nih. 11 Trongtrainan mi san unla, mi tam tak trongtraina zarin lunginsietna dong kan ta, keini leiin mi tam takin Pathien kuomah lawmthu hril thei an tih.

12 Kan uongpui chu hi hi a nih: khawvel varna ang ni loin Pathien lunginsietna lei chauh lemin Pathiena inthoka suok nun thienghlim le ngîl tak chu putin khawvela hin kan khawsa hlak a, chu chu nangni lai hin a ni nawkzuol ti mi hrepuitu chu kan sie le thra hrietna hi a nih. 13 Kan lekhathona khan in tiema in hriet thiem naw ding ieng khom kan ziek naw kha. 14 Tu hin in la hriet thiem vong nawa chu, Lalpa Isu Ni-a kan uongpui ding in ni ang bokin in uongpui ding kan nizie hi a kimin in la hung hriet chieng pei ka beisei.

15 Chu chu ka ring tlat leiin hlawkna trum hni in chang theina dingin sir hmasak phot chêu ka tum a. 16 Makedonia ka fe malamin sir chêu a, Makedonia rama inthoka ka hung kir tieng sir nawk chĕu ka tum a, chu taka inthok chun Judai ram tienga ka’n zin peina dinga khom in mi san ka beisei. 17 Hi hi ka remruot lai hin tum mumal nei lo ka hoi am a nih? An naw leh rem ka ruot lai hin khawvel mihai thaw dan hmangin, a châng leh “A nih, a nih” ti a, a nâwkah “A ni nawh, a ni nawh” ti mei mei am ka nih? 18 Pathien chu a ringum leiin in kuoma kan thucha khom a chângin “A nih” ti le a chângin “A ni nawh” ti ang hi a ni nawh. 19 Kei le Silvan le Timothe haiin in kuoma a chanchin kan hril, Isu Krista, Pathien Naupa chu “A nih” le “A ni nawh” a ni kop ve si nawh; amaa chun “A nih” ti chauh a um. 20 Pathien thu tiem chu ieng zât khom ni sien, Kristaa chun “A nih” ti vong a nih. Chuleiin, Pathien ropuina dingin Isu Krista zarah “Amen” ei ti hlak a nih.

21 Keini le nangni mi siemtu, Kristaa mi suknghettu le hriek mi năltu chu Pathien a nih.

22 Ama ta ei nizie suoi nama mi’n chiktu le ei lungrila zakhamna thlarau mi petu Pathien a nih. 23 Nangni hlà ding cheuin Korinth khuo ka hung sir nawk ta naw a nih ti mi hrepuitu chu Pathien a nih. 24 In ringna chungah insuklal kan tum naw a, in lawmna dinga nangni le thok tlang ei ni lem, ringnaa chun in ngir nghet si a.