Tirko ngirhmun
9
1 Zalên ka ni naw maw? Tirko ka ni naw maw? Ei Lalpa Isu Krista hmu tah ka ni naw maw? Lalpaa ka sinthaw ra chu nangni hi in ni naw maw? 2 Mi danghai ta dingin tirko ka ni naw a lo ni khomin, nangni ta ding chun ka ni chieng khop el. Lalpaa tirko ka nina namnghettu suoi chu nangni hi in ni si a. 3 Hi hi mi soiseltuhai ka donna hlak chu a nih. 4 Fâk le dawn dong theina chanvo kan nei naw bik am a ni? 5 Tirko danghai, Lalpa unauhai le Kifa hai angin inzinnaah ringtu nuhmeihai kan thruoi ve thei naw bik am a ni? 6 Kei le Barnaba chauh hi’m kan nih kuta sinthawa mani inchawm bik ding chu? 7 Mani inchawm fawma sipaia thrang tu am an um hlak a? A ra fa si loin tuin am grep huon a siem hlak a? A nenetui dawn si loin tuin am ran a vai hlak? 8 Hieng ka hrilhai hi mihriem thlir dan mei mei am a ni? Dan thu khomin hieng hi a hril a ni naw maw? 9 Mosie Dana chun, “Bawngchalin bu a chǐl laiin a hmŭr khuop naw rawh” ti a nih. Pathienin bawngchal ta ding chauin am a nih a ngaituo? 10 Keini ta ding tak lem hin an naw maw a lo hril? Ni e, keini ta dinga ziek a nih. Hnuoi inlettu chun beisei neiin inlet sien, bu chîltu khomin chan nei ve beiseiin chîl raw se. 11 Nangni lai thlarau thlai chi kan tu a, in kuoma inthokin taksa tieng thila khom ra sîk ding lo ni inlang, inthlahrungna ding ieng am a um a? 12 Mi dang hmanin in lakah chuong ang thil an phût ngam chun keini lem chun kan phût ngam nawkzuol naw di’m a ni? Sienkhom ieng khom kan phŭt ngai nawh. Phŭt nêk hmanin, Krista Chanchin Thra dâltu kan ni nawna dingin iengkim kan tuor hrăm hrâm lem hlak.
13 Tempula rongbawltuhai chun tempula mi thil an fàk a, maichama thilhlân inhlàntuhai khomin an thil inhlàna inthokin chan an nei ve ti in hriet naw’m a ni? 14 Chuong ang bokin, Chanchin Thra hi Chanchin Thra hriltuhai fàk hmŭna dinga Lalpan a ruot a nih. 15 Kei chun hieng hamthratnahai hi ka sor ve hrim hrim nawh. Hieng thil hi ka chunga in thaw beisei leia ka ziek a ni nawh. Ka uongpui hi ieng khom loa in mi ngaipek nêk chun thi khom ka thlang lem. 16 Chanchin Thra ka hril leia uong ka ni nawh, hril lo thei lo ka nih. Chanchin Thra hi hril ta naw lang chu ka chung a va rik awm de aw! 17 Mani nuom thua hril ni lang, hlaw khom nei ka tih. Mani nuom thua hril ka ni si nawh, Chanchin Thra enkol sin chu inkoltira ka um lei a nih. 18 An leh ka lawmman chu iem ni tang a ta? Chanchin Thra hriltu ka ni leia ka phŭt thei phût loa a thlawna Chanchin Thra ka hril theina hi ka lawmman chu a nih.
19 Tu bawi ni naw lang khom a tam thei ang tak mi ka lăk theina dingin mi tin bawiah ka’n siem hlak. 20 Judahai ka lăk theina dingin Judahai lai Juda mi angin ka um a; Dan hnuoia um ni naw lang khom Dan hnuoia mihai ka lăk theina dingin Dan hnuoia um angin ka khawsa hlak. 21 Dan nei nawhai ka lăk theina dingin Dan nei lo angin ka um hlak, Pathien dan zawm naw ni si loin, Krista dan zawm tlat siin. 22 Mi hrât nawhai ka lăk theina dingin anni lai hrât naw angin ka um hlak. Chuong ang chun ieng ti kong zawng bêkin amanih mi threnkhat ka sandam theina dingin mi tin lai kong hrang hrangin ka khawsa hlak. 23 Chanchin Thra leiin chuong thilhai chu ka thaw hlak, a malsawmna ka dong theina dingin.
24 Intlansiekhai chu an tlân senga chu pakhat chauin lawmman a dong hlak ti in hriet naw’m a ni? Chuong ang chun lawmman dong dingin tlân ro. 25 Intlansieka thranghai chu kong iengkimah inthununna khauh tak hnuoiah an inbuotsai hlak. Anni chun chawimawina lukhum se thei hmu dingin an bei a; eini ruok chun chatuon dai lallukhum hmu dingin ei bei a nih. 26 Chuleiin, pan chieng tak neiin ka tlân a, boruok hnektu ang mei meiin ka hnek ngai nawh; 27 ka taksa ka hnek chor chor a, ka bawiah ka siem a; chuong naw chun mihai kuoma Chanchin Thra hriltu ni ta siin lawmman dong phak loa hnăwl ni hlauh rawi ka tih.