Milim biekna sa fak chungchang
8
1 Milim biekna sa fak chungchang thua khan, “ei rêngin hrietna ei kol seng” in ti kha a’n dik. Sienkhom chuong ang hrietna chun mi a sukchapo hlak a, hmangaina ruok chun mi a siem thra hlak. 2 Tu khom thil hrea inngai chun a hriet ding ang takin a la hriet tawk naw a nih. 3 Miin Pathien a hmangai ruok chun ama chu Pathien mi hriet a nih. 4 Chuongchun, milim bieknaa an sa inhlàn fak thua chun, khawvela hin milim hi ieng khom a ni nawzie le Pathien pakhat chauh naw chu a dang hrim hrim an um nawh ti ei hriet. 5 Van amanih, hnuoi amaniah pathien anga ngai tam tak an um thei a, chuong angin pathien tam tak le lalpa tam tak khom an um hrim a. 6 Nisienlakhom, eini ta ding ruok chun Pathien pakhat chauh, Pa chu a um a, thil iengkim ama leiin a um a, eini khom ama ta dinga um ei nih; chun, Lalpa pakhat chauh, Krista Isu chu, a um bok a; thil iengkim hi ama hmanga siem a na, eini khom ama leia um ei nih.a7 Nisienlakhom, hi hi mi po poin an hriet vong nawh. Threnkhat chu milim be thrang an ni leiin, sa an fak pha leh milim kuoma inthawina sa anga ngaiin an fak hlak a, an sie le thra hrietna a hrât si naw leiin inthieng naw angin an inngai hlak. 8 Ieng khom ni sien, ei thil fak hin Pathien a mi’n hnaitir naw a, fa naw inla khom a mi’n hlattir bok naw a, fak khomin a mi’n hnaitir chuong nawh.
9 Amiruokchu, fimkhur ro, in zalenna chu ringnaa hrât nawhai tlŭkna lo ni pal hlauh rawi a tih. 10 Nang, chu hrietna nei ta sa chun milim biekna ina bu i fak lai chu sie le thra hrietnaa hrât loin hmu sien, milim kuoma thil inhlànhai a fâk ngam pha ve el naw ding maw? 11 Chuong a ni si chun i unau, mi hrât naw, a thi aia Krista thi chu, i hrietthiemna chun a suksiet a nih. 12 Chuong anga i unau chunga thil suol thaw a, a sie le thra hrietna hrat naw tak i sukhliem chun Krista chungah thil suol i thaw a nih. 13 Chuleiin, ka thil fâkin suolah ka unau a’n tlŭktir si chun, ka unau ka sukthluk nawna dingin sa hrim hrim nghei dêr ta’ng ka tih.