Kohran sunga inngaina porche
5
1 Ringnawtuhai lai hmana thil um ngai lo inditna porchĕ nangni lai a um thu le pa pakhatin a pa thaikĕma a zălpui ti thu a’n thang a. 2 Chu chu poiti ta nêkin in la uongpui ta deu deu a ni awm a! Chuong ang mi chu nangni pawl laia inthoka hnot suok ding a ni nawm a ni? 3 Taksain nangni lai um naw lang khom thlarauah ka um a, chuong ang thawtu chungchang chu nangni laia um angin Lalpa Isu hmingin ka lo rĕl fel dĕr tah. 4 In inkhawm pha leh kei khom nangni lai thlarauin thrang ka ta, Lalpa Isu thuneina hmangin, 5 Lalpa Ni-a a thlarau sandama a um theina dingin chu pa taksa chu sukbohmang dingin Setan kuomah pe suok ro.6 In uong hi a thra nawh. Chol tlawmtein bei tlang hlŭm a chie tho vong hlak ti in hriet naw maw? 7 Chol thrang lo bei in ni ang hrimin, chol thrang lo bei hlŭm tharlâm hlak in hung ni theina dingin chol hlui chu zen fai ro. Krista, ei Fekân kŭtna ding Beramte chu inhlănin a um ta si a. 8 Chuleiin, suolna le rîtlona chol hluia inchie tho bei ni loin, chol thrang lo, thienghlimna le thutaka inchie tho beiin kût hmang lem ei tiu.
9 Ka lekhathona khan inngai hmanghai leh inpol sop lo dingin ka hril ta chêu kha. 10 Chu chun hi khawvel mi, inngai hmang hai, duâm hai, hlêm hmang hai le milim behai hi pawlser ro ka tǐna a ni dĕr nawh. In pawlser ding a ni chun khawvel hi in suoksan hlol ngai a tih. 11 Ringtu unau inti si, sienkhom inngai hmang, mi duâm, milim betu, mi dem hmang, zu rui hmang le mi hlĕm hmanghai leh inpol sop lo ding le anni lai a fak khom fa lo dingin ka ti lem chêu a ni kha. 12 Kohran puo tienga umhai chungthu chu keia rêl ding am a ni? A sunga umhai thu chauh ei rêl ding an naw maw? 13 Puo tieng mihai chungthu chu Pathienin rêl a tih. Chuong ang mi suol chu nangni laia inthokin hnot suok ro.