Krista tirkohai
4
1 Keini hi mihaiin Krista rongbawltu le Pathien thurûk enkoltuah mi ngai raw hai se. 2 Chun, enkoltua ruothai chu an ringum phot ding a nih. 3 Nangni amanih, mihriem rorêltuhaiin amanih in mi lo inkhǐna hi ieng rakah ka ngai nawh, keima ngei khom ka’n khǐ ngai bok nawh. 4 Ka sie le thra hrietnain inthiem nawna ieng khom ka nei naw a, sienkhom soisel bo ka nih tìna a ni chuong nawh; a mi’n khìtu chu Lalpa a ni lem. 5 Chuleiin, Lalpa hung hma, a hun ruot a tlung hma chun inkhì el naw ro. Ama chun thima thup rûkhai le mihriem lungrila tum rûkhai po po chu varah hung phor lang a ta, mi tinin mani phu tawk ang sengin Pathien inpăk hlawng an tih.6 Unauhai, “Thu zieka um bâk chu thaw naw ro” ti kha in inchŭk theina dingin kei le Appolo hi in enton dingin ka hung intar lang a nih, tu khomin pakhat suong a, pakhat lem in hnuoisie nawna dingin. 7 Mi dang nĕka chunghnung bikin tuin am an en chêu a? In dong naw iem nei in nei a? In dong a ni si chun ieng dinga dong lo anga in uong am a na?
8 In burip ta ie! In hausa ta hi tie! Keini thrang lo khomin in inlal ta khop el! Inlal tak tak chu ni unla kan va ti de, in zăra hang inlal ve ding chu! 9 Keini tirkohai ruok hi chu thi dinga ruothai hnung dâla Pathienin a nuhnung taka a mi sie amanih ka ti hiel hlak, a san chu khawvel le vantirkohai le mi po po ennuom kan inchang ta hi. 10 Keini chu Krista leiin mi invêt kan ni a, nangni ruok chu Krista leiin mi var in nih. Keini kan hrăt naw a, nangni in hrăt thung a. Keini chu mi hmusit kan na, nangni chun mi ngaisang in hlaw a. 11 Tu chen khom hin phingtrâm le dangchârin, silfen triek inbelin, mi kut thak nŭlnaa thrangin kan invăkvai a. 12 Kuta inrim taka sinthawin făk kan zong a, miin trong sie an mi’n phur leh mal kan sawm thung a, an mi suknomna leh sel takin kan tuor a, 13 an mi biek sìsaw leh zaidam takin kan don a. Tu chen khom hin hnuoi hmunhnok, khawvel hnawmtinphur ang chaua mi ngâi kan nih.
14 Hieng thil hi sukzak ding chĕua ka ziek a ni naw a, ka nau dittakhai anga zilna ding chĕua ka ziek a nih. 15 Krista tienga keihruoitu ding chêu a sîng têlin nei inla khom, pa ruok chu tam tak in nei nawh: kei hi Kristaa in pa, Isu Chanchin Thraa hringtu chĕu chu ka nih. 16 Chuleiin, mi enton dingin ka ngĕn chêu a nih. 17 Hi lei hin ka nau dittak, Lalpaa mi ringum Timothe chu in kuomah ka hung tir a nih; ama chun Kristaa ka nun dan ang char hmun tina kohranhai kan chŭktir hlak chu, inhriettir nawk a ti chêu. 18 In kuoma kei hung nawk ta naw ding ang elin threnkhat chu in insukngêng hle a. 19 Lalpan rem a ti chun ka hung kan nâwk vak ding chĕu a na, chu huna chun hieng mi uongthuonghai hin iem an hril ti le ieng thilthawtheina am an nei ti la hung hmu suok ka tih. 20 Pathien ram chu thu ela innghat a ni naw a, thilthawtheinaa innghat a ni lem. 21 A ieng am in thlang lem a? Hmol chawiin am ka hung inthok ding, an naw leh hmangaina le thuhnuoirolna lungril putin?