Ringtu unauhai laia thubuoi
6
1 Nangni lai tu khomin a unau dang leh thubuoi nei sien, mi thienghlimhai kuomah intlun loin ringnawtu kuomah an tlun lem dim a ni? 2 Pathien mihai hi khawvel chungthu rêlpêktu ding an nih ti in hriet naw maw? Khawvel chungthu rêlpêktu ding in ni si chun thil chîn tham rêltu ding lem chun in tlâk hle naw ding maw? 3 Dam sung thil chu hril lo, vantirkohai chungthu chen khom ei la rĕl ding a nih ti in hriet naw maw? 4 Chuleiin, dam sung thil rĕl ding in neiin Kohranin ienga khoma a ngai naw hai in inrĕltir dim a ni? 5 Inzak a va hang um de! Unau lai thu rem thei mi var pakhat khom in um nawh tǐna a ni? 6 Ringtuin ringnawtu rêl dinga a unau a khing tlat hi iem an ta le?7 Nangni kârah thubuoi in nei hin in tlawm dĕr tina a nih. Ieng leia tlawm lem ni in rin am a na? A dăwng lem ni khom iem a poi a? 8 Chuong nêk hmanin mani unauhai poi tawktu le sukdawngtu in ni lem hman si a. 9 Mi rilohai chun Pathien ram hluo naw ni hai ti in hriet naw maw? Hlĕmin um naw ro. Inngai hmang hai, milim be hai, uire hai, mongkawhur hai le an chǐngpui hai, 10 rukru hai, mi duâm hai, zu rui hmang hai, mi dem le hril siet hmang hai le hlĕm hmang haiin Pathien ram hluo naw ni hai. 11 Nangni laia threnkhat chu chuong ang mi chu in ni hlak a, nisienlakhom Lalpa Isu Krista hming le ei Pathien Thlaraua sawp fai le sukthieng le thiem inchangtir in ni tah.
Taksaa Pathien chawimawi
12 “Ka ta dingin iengkim a thieng,” sienkhom a trangkai vong chuong nawh. “Ka ta dingin iengkim a thieng,” sienkhom ieng bawia khom um ka’n phal nawh. 13 Bu hi phǐng ta ding a na, phǐng khom bu ta ding a nih, sienkhom Pathienin sukbohmang ve ve’ng a tih. Taksa hi inngaina ding a ni naw a, Lalpa ta ding a ni lem, Lalpa khom taksa ta ding a nih. 14 Pathienin Lalpa chu a keitho a, eini khom a thilthawtheina chun mi keitho ve’ng a tih. 15 In taksa chu Krista taksa pĕng a nih ti in hriet nawm a ni? Krista taksa pĕng chu lain nawchizor pêngah in siem ding am a ni? Siem lul lo e! 16 Miin nawchizor a’n zompui chun taksa pum khat an ni tah ti in hriet naw’m a ni? “An pahni chun taksa pumkhat an hung ni tah” ti ziek a ni kha. 17 Lalpa inzompuitu ruok chu ama leh thlarau pumkhat an nih. 18 Inngaina suol hi bansan ro. Thil suol dang ieng khom miin a thaw chun a taksa puo tieng thil a na, inngaina suol ruok chu mani taksa chunga thil suol thawna a nih. 19 Pathien pêk chĕu, nangnia um, Thlarau Thienghlim chĕngna tempul chu in taksa hi a nih ti in hriet naw’m a ni? Nangni ta in ni ta nawh; 20 mana inchawk in ni tah. Chuleiin, in taksain Pathien chawimawi ro.