3 Nangni lai tu khom mani nǐna bâka inngai sâng lo a, lungril fîm puta mani inbi chieng a, Pathien mi pĕk ei ringna phu tawk ang peia insie lem dingin Pathienin lunginsietna a mi pĕk zărin ka ngĕn chêu a nih. 4 Taksa pum khatah bung hrang tam tak ei nei a, bung hrang hrang sinthaw a dang seng. 5 Chuong ang bokin, tam tak ni inla khom Kristaa chun taksa pumkhat ei ni a, ei rêng hin taksa bung anga inpêng tuo vong ei nih. 6 Lunginsietna a mi pek ang peiin thilpêk tum tum ei nei a, chuong ang tak chun hmang ei tiu. Thuhriltu ei ni chun ei ringna le inphû tâwkin hril ei tiu. 7 Rongbâwltu ei ni chun thrahnemngai takin bâwl ei tiu. Zirtirtu ei ni chun zirtir ei tiu. 8 Infŭitu ei ni chun mi chokphûr ei tiu. Somdawltu ei ni chun phal takin peng ei tiu. Thruoitu ei ni chun taima takin thruoi ei tiu. Lunginsiettu chun hlim takin lunginsiet ei tiu.

9 Hmangaina chu a takin ni raw se. Suol chu theida unla, a thra chu pom tlat ro. 10 Unau an inlainat angin inlainat tuo unla, mani nĕkin mi dang chawimawi uor lem ro. 11 Inthlădă ngai naw unla, lungril phûr takin Lalpa rong chu bawl ro. 12 Beiseina chun suklawm sien la chêu, sukdŭdăna chu sel takin tuor unla, ieng lai khomin trongtrai ro. 13 Pathien mihai tlăksamna chu somdawl unla, mikhuol lawm hlak ro. 14 A suknomnatuhai chêu chu malsawm unla, trongsie inphur naw ro. 15 Lawmhai chu lawmpui unla, traphai chu trappui ro. 16 Mi leh inrem takin um diel diel unla, chapo naw unla, mi hnuoihnunghai chu inpawlpui lem hlak unla, indŭ ngai naw ro. 17 Suol chu suolin thungrul naw unla, mi po po ngaia mawi chu ngaituo lem ro. 18 A thei phot chun, nangni tienga bĕk mi po po leh inrem tum ro. 19 Dittakhai, phubâ la naw unla, Pathien lungsennaa rul dingin khêk lem ro; “Phuba lâk chu ka chan a nih, keiman thungrul ka tih” Lalpan a tih, ti ziek a ni si a. 20 Chuong nĕk hmanin,

21 Suol hnèin um naw la, suol chu thratnain hnè lem rawh.