Enton ding Abraham
4
1 Anleh, taksa tienga ei thlatu Abraham thu kha ieng tin am hril tâng ei ta? 2 Abraham kha thilthaw leia thiemchang chu lo ni sien, uongpui ding a nei a nih, Pathien hmaa ruok chu ni loin. 3 Pathien lekhathuin iem a hril a? “Abraham chun Pathien a ring a, chu ringna lei chun thiemchanga ruot a nih” tiin a hril a nih. 4 Mi’n sin a thaw chun a hlaw chu thilpêka ngai a ni naw a, bat anga ngai a nih. 5 Amiruokchu, mi’n misuolhai thiem inchangtirtu a ring a, a thilthaw lei ni loa thiem inchangtira a um hin a ringna leiin thiem a chang a nih ei ti hlak. 6 Thilthaw lei ni loa, Pathienin thiem a’n changtirhai hamthratzie chu Davida khomin hieng hin a hril kha:7 “An bawsietnahai ngaidama um a,
An suolhai thai boa um chu,
An va hang hamthra lawm lawm de!
8 Lalpan suol nei loa a ngaihai chu,
tiin.
9 Anleh, chu hamthratna chu sertanhai ta ding chauh am a ni, an naw leh sertan nawhai ta ding khom? Abraham ringna chu a felnaa ruot a nih tiin ei hril rop hlak kha. 10 Chu chu ieng ti kongin am ruot a ni thei a? Ser a tan hmain a ni, ser a tan hnungin? A sertan hnung ni loin, a sertan hmain a ni lem. 11 A sertan hmain sertan inchikna a dong a, chu ringna lei chun Pathienin thiem a’n changtir a nih ti namnghetna dingin ser a tan chauh a ni lem. Sertan nawhai khom ringna leia Pathienin thiem a’n changtirhai ta ding chun Abraham chu thlarau tienga pa a nih. 12 Chuong ang bokin, sertanhai pa khom a na, sertan a ni lei el khom ni loin, ama ei pa Abrahamin ser a tan hmaa ringna a nei ang bok kha ringna an nei ve lei a nih.
Ringna leia thutiem hlen
13 Dan zawm lei ni loin, ringna leia thiem inchangtir an nina lei lemin, Pathien chun Abraham kuomah ama le a thlahaiin khawvel hi an la rochung ding thu chu a tiem a nih. 14 Dan zawm hi rohluotu nina ni sien chu, ringna chu a thlawn el ni’ng a ta, thutiem khom chu ieng khom ni naw nih. 15 Dan chun lungsenna a cho suok a; Dan a um nawnaah chun bawsietna khom a um nawh.
16 Chuleiin, Dan zawmtuhai ta ding chauh ni lo a, Abraham thla po po, ama ring anga ringtuhai ta dinga Pathien thilthlawnpek a nizie suklang dingin Abraham kuoma a thutiem kha ringnaah a’n nghat a nih. 17 “Hnam tam tak pa-ah siem ka ti che” ti ziek ang khan, a ring Pathien, mithihai sukhring nawktu le thil um lo khom inumtirtu hmaah chun Abraham chu ei rênga pâ a nih. 18 “Khi ang zăt khi i thlahai la ning an tih” tia hnam tam tak pa ni dinga thutiem chu beisei ding a um naw lai khomin beisei takin a ring tlat a. 19 Kum za ding hiela upa a lo ni tah a, a taksa en chun mithi ang el a ni tah ti le Sari ngei khom chu a ching a nih tihai ngaituona chun a ringna chu a sukchău ngai nawh. 20 Ringhlăna chun Pathien thutiem lakah a sukhnǐng ngai naw a, chuong nêk hmanin a ringnaa chun sukhrâta umin, Pathien a chawimawi lem a, 21 a thutiem chu hlen dingin Pathienin thilthawtheina a nei ti a ring tlat a. 22 Chu lei chun, “a ringna chu a felnaa ruot a nih”.