Inpuongna, ngaidamna, hlimna
Davida ta. Hla var
32
1 A bawsiethai ngaidama um,A suolhai thaiboa um chu,
A va hang hamthra lawm lawm de!
2 Suol nei loa LALPAN a ngai,
Hlêmna lungril nei lo mi chu,
A va hang hamthra lawm lawm ngei!
3 Trong loa ka to tlat lai khan,a
Sunnithlak ka’n rŭmna leiin,
Ka rù le châng a zûr zo tah.
4 Sŭn-zàna i kut rik tuorin,
Thrâl rum angin ka trâwl zo tah.
5 “Ka bawsiethai LALPA kuomah,
Inpuong fai vong ka tih” ka ta;
Ka suolnahai ip nei loin,
I hmaah ka hung inpuong a,
Chuongchun, ka suol i ngaidam tah.
6 Chuleiin, hmu thei i ni lai,
Pathien ngaisak mi taphot chun,
Trongtraiin i hmaah kûn sien,
Buoina tui lien insang pha khom,
Anni chu chîm phâk ngai naw nih.
7 Nang chu ka’n bǐkrŭkna i na,
Buoina lakah mi humhimin,
Sansuokna hla’n i mi’n awi hlak.
8 Kal chawi dan inchuktir ka che,
Rem ruotpuiin enkai ka che.
9 Hriet thiemna nei lo sakor le
Sabengtung ang ni ve naw rawh.
Thunun dingin thirbar a ngai,
Chuong naw chun, i thû zawm naw nih.
10 Mi rilohai tuor ding a sà;
LALPA ringsantuhai ruok chu,
A hmangaina chuoi ngai lo chun,
Ieng lai khomin an huol vel hlak.
11 LALPA-a chun, aw mi felhai,
Lawm rop unla, hlim bok hlak ro;
Lungril ngîl puttuhai po chun,
Inring takin lawm hla sak ro.