Pathien rorêlna indik
2
1 Chuleiin aw mihriem, tu khom soisel thei bik ding i ni nawh, mi dang i soiselna ngei chun nang khom thiemnaw inchangtir a ti che, chuong thil chu a soiseltu ngeiin i thaw ve hlak tho si a. 2 Chuong thil thaw hlakhai chu Pathienin thiem naw a’n changtir chun a thaw indik a nih ti ei hriet. 3 Aw mihriem, chuong thil thaw hlakhai soisĕltu, nangin chuong thil chu i thaw ve hlak tho si leiin Pathien rorêlna chu pumpel bik i’n ring am a nih? 4 Annawleh, i simna dingin Pathienin thratnan a thruoi hlak chê ti hre fu loin, a thratna hauzie, a entheizie le zaidawtheizie dam chu i ngainêp el am an ta? 5 I lulul le lungril ngar leiin lungsenna ni le Pathien rorêlna nia dingin i chungah hremna i khâwl khâwm chauh lem a nih. 6 Pathien chun mi tin an thilthaw ang peiin a rĕlpĕk ding a ni si a. 7 Thil thra thaw fan fan a, bohmang thei lo ropuina le chawimawina zongtuhai kuoma chun chatuon hringna pe’ng a tih. 8 Amiruokchu, mani hmâ chauh siel mi, thutak hnâwltu, thil indik lo zawm lemtuhai chunga chun Pathienin a lungsenna le theidăna la bun thlang a tih. 9 Thilsuol thaw taphothai chungah rinumna le lungngaina tlung a ta, a hmasa’n Juda mihai chungah, chu zoah Jentelhai chungah tlung a tih; 10 sienkhom thil thra thawtuhai ruok chu ropuina dâm, chawimawina dâm le lungmuongna dàm pĕk ni’ng an tih, a hmasa’n Judahai kuomah, chu zoah Jentelhai kuomah. 11 Pathienin mi ditsak bîk a nei si nawh.12 Dan boa suol thawtuhai chu Dan boin bohmang an ta; Dan nei zinga suol thawtuhai chu Dan hmanga an chungthu rĕl ni’ng a tih. 13 Dan hretuhai ni loin a zăwma zăwm lemtuhai chun Pathien hmaah thiem chang an tih. 14 Dan nei ve lo Jentelhaiin an piengpui lungvar hmanga danin a phŭt ang an thaw chun, Dan nei naw hai sien khom Dan neiah an insiem a nih. 15 Danin a phŭthai chu an lungrilah ziekin a um ti an nungchangah an suklang a, chu chu an sie le thra hrietnain a hrietpui a; lungrila mani inthiem le inthiem naw nachang an hriet bok.a 16 Isu Krista hmanga mihriemhai ngaituona rŭk Pathienin a ngaituo ni chun ka Chanchin Thra hril ang hin rêl a tih.
Judahai le Dan
17 Nang chu Juda mi i’n ti a, Dan chu i ringsan a, Pathien i uongpui a, 18 a ditzawng khom i hriet a, Dan i hriet leiin a sie le a thra khom i hriet a; 19 mitdelhai keithruoitu, thima umhai ĕntu, 20 mi invêthai thruoi vartu, naupangtehai zirtirtu tak niin i’n ngai a; Dan thuah chun hrietna le thutak a’n phûm ti i hriet chieng leiin. 21 Mi danghai zirtirtu inti siin ieng dinga nang le nang i’n chuktir naw’m a na? Inru lo dinga mi hriltu, nangin i’n rûk hlak si maw? 22 Uire lo dingin mi i hril a, nang chu i uire hlak si maw? Milim theidatu ni siin milim biekna ina thilhai chu i rok hlak si maw? 23 Dan uongpuitu, nangin Dan i bawsiet leiin Pathien i sukhmingsiet hlak an naw maw? 24 “Pathien hming chu nangni leiin Jentelhai lai sukpâwiin a um tah” ti ziek ang khan.
25 Dan zawm la chu sertan hi a trangkai takzet a nih. Dan bawsetu i ni ruok chun i sertan chu tan naw ang chie a nih. 26 Chuleiin, sertan lo khomin Dan thupêkhai a vong thra chun sertan anga ngai a ni naw ding maw? 27 Sertan nawtuin Dan thu a zawm kim chun nang, dan bu le sertan dan nei sia Dan bawsetu chu thiem naw inchangtir a ti che. 28 A’n lang chaua Juda mi ni chu Juda mi tak tak nǐna a ni naw a; taksa chaua sertan chu sertan tak tak nǐna a ni chuong bok nawh. 29 Sûng rila Juda mi ni ruok chu Juda tak tak a nih; sertan tak tak chu lungril tienga tan hi a nih, lekha thu elah ni loin, Thlarau tiengah a ni lem. Chuong ang mi chu mihriemin inpâk nawhai sien khom Pathienin chawimawi a tih.