2 Chu Chanchin Thra chu, kha hmaa inthok khan Pathienin a zawlneihai hmangin a Lekha Thienghlimah a lo tiem tah a; 3 chu chu a Naupa, ei Lalpa Isu Krista, taksa tieng Davida thlaa inthoka pieng, 4 thienghlimna thlarau tieng ruok chu thinaa inthoka thilthawtheinaa keithoa Pathien Naupa a nizie puonga um chu a nih. 5 Ama zâr le a hming leiin hnam tina mihai chu ringa inawitir dinga ko dingin Pathien lunginsietna le tirko nina kan chang a, 6 nangni khom chuong anga Isu Krista mihai ni dinga kohai laia mi chu in nih.

7 Pathienin a hmangai le ama mi thienghlim ni dinga a ko, Rom khuoa mihai chibai ka bûk chêu. Pathien ei Paa inthok le Lal Krista Isu kuoma inthoka lunginsietna le inremna chu in chungah um raw se.

8 A hmasatakin, ringtu in nizie thu khawvel po poah an hril thang leiin in rênga ta dingin Isu Krista hmingin ka Pathien kuomah lawmthu ka hril. 9 Ka trongtrainaah ieng lai khomin ka hriet zing hlak chêu ti chu theitawpa a Naupa Chanchin Thra rong ka bawl, ka Pathien chu mi hrepuitu a nih. 10 Pathienin rem a ti chun tuta trum bĕk hin chu ka hung kan theina ding chêuin Ama ka hni zing a. 11 In hrăt zuol theina dingin Thlarau tieng thilpêk iemani bĕk hung hawnpêk chêu ka châk hlè a nih, 12 ringna tieng kei le nangni inchawm tuoa ei insukhrât tuo theina dingin.

13 Unauhai, Jentel danghai laia ra ka sîk hlak ang boka nangni lai khom ra sîk ding ka hmu ve beiseiin voi tam tak in kuomah hung ka tum taa chu remchang nawna’n tu chen hin a mi la dang zing leiin ka la hung thei hri naw a nih ti in hriet ka nuom. 14 Grik mihai, awze mihai^a le mi var le mi mâwlhai laka khom bat ka nei a; 15 chu lei tak chun a nih nangni Rom mihai kuoma khom Chanchin Thra hril ka châk ĕm êm chu ni.

16 Chanchin Thra hi ka’n zàpui si nawh, a ringtu taphothai sandamna dinga Pathien thilthawtheina a ni si a. A hmasain Judahai ta ding a ni phot a, a dotah Jentelhai ta ding a hung ni nawk a. 17 Chu taka chun Pathien felna chu ringnaa inthoka ringnaah suklangin a um pei a, “Ringna leia mi fel chu hring a tih” ti ziek ang khan.^b

18 Pathien ngaisaknawhai le mi rilohai, rîtlona leia thutak dodâltuhai chungah Pathien lungsenna chu vana inthokin a hung inlang a. 19 Olsam taka Pathien chanchin an hriet thei dan ding chu Pathien ngeiin tlang takin an kuomah a’n langtir a. 20 A nina, mita hmu thei lo, a chatuon thilthawtheina le a Pathienzie chu leilung siem tǐra inthokin a thilsiemah chieng taka hmu le hriet theiin a’n langtir leiin mi tu khomin suonlam ding hrim an nei nawh. 21 Pathien chu an hriet a, Pathien ang ruok chun an chawimawi naw a, lawmthu khom an hril bok nawh; teplo mei mei an ngaituo lem leiin an lungril mumal naw tak chu a hung inthim zo tah a nih. 22 Vàra inngâi si, mi invêt an hung ni zo tah. 23 Thi thei lo Pathien ropui chu thi thei mihriem dam, vatê dam, sapheimanli^c dam le bokvâka intawl thilhring dam lim ang chauin an inchangtir si.

24 Chuleiin an lungril chăk zawng thil porche thaw ding le an taksa chu muolpho taka chêt phalin Pathienin a nghatsan tah a nih. 25 Pathien thu nêkin khêl an thlang lem a, Siemtu chawibiek nêkin a thilsiemhai chu bein an rong an bawl ta lem si a. Siemtu chu chatuona inpâk tlâk a nih. Amen

26 Chuong lei chun an tisa châk zawng tirdakum tak chu thaw dingin Pathienin a nghatsan tah a nih. An nuhmeihai chen khom nuhmei le pasal indit dan phung pangngai khĕlah nun letling an hraw a. 27 Chuong ang bokin, pasalhai khom an nuhmeihai le khawsak dan pangngai bansanin, anni le anni inchâkin an inhnar tuo a, pasal le pasal khom mawi naw takin an khawsa a, an suol ra chu an taksa ngei chun a tuor tah a nih.

28 Chu bâkah, Pathien tieng hrietna indik chu an thlăthlàm tăk leiin ngaituona hmang tlak lo put ding le mawi naw taka khawsa dingin Pathienin a pêk suok tah a nih. 29 Chuongchun, rîtlona tinrêng thawin, suolna dâm, inhnarna dâm, intheidăna dâm, thîkna dâm, tuolthatna dâm, inerna dâm, inhlĕmna dâm le inhrilsietna dâmin an hung sip a. 30 An indem a, Pathien an theida a^d, an intivei a, an chapo a, an uongthuong a, thil suol thar chǐng suok an insukhmu a, nu le pa poisak lo an chǐng a, 31 an intlaw a, an depde a, lunginsietna an piengpui naw a, an tawrot bok a nih. 32 Chuong thil thawtuhai chu Pathien ruot anga thi tlâk an nih ti hre zing siin an thaw zui zing băkah mi dang a thaw vehai chu an la ngaisăng letling nawknghal a!