Malta thlierkarah
28
1 Him taka kan kai hnung chun chu thlierkar hming chu Malta a nih ti kan hriet tah a. 2 A ram mihai chun an mi lo lunginsiet ĕm êm a. Ruo a sûr lei le a dei ĕm leiin meipui an sĕm a, kan rêngin an mi lo lawm a.3 Paulan thing têl khat a’n khawm a, meiah chun a buk a, a sat leia rûl hung suok chun a kutah a zem a. 4 Chu taka mihaiin a kut rûlin a zem an hmu chun, “Hi pa hi thuolthat a ni phot el, tuipuia inthokin tlân suok sien khom, indik taka Rorêltu chun a dam a phal naw a ni hi” an ta. 5 Nisienlakhom, Paula chun rûl chu meiah a thin thlak a, ieng khom a ti naw a. 6 Anni chun an vûng nghal an naw leh kâr loah tlu a, a thi nghal an ring a. Sawt fe an nghak a, ieng khom a ti nawh ti an hmu chun an lungril an thlâk a, “Pathien a ni hi” an ti nawk ta thung a.
7 Chu hmun kawl ela chun thlierkar lal Publia hmun le ram a um a. Ama chun a mi lo lawm a, ni thum zet lawm takin a mi’n tlungtir a. 8 Publia pa chu khawsik le santen invoia khumbet a lo ni a. Paulan a va en a, a lu-ah kut a’n nghat a, a trongtrai a, a sukdam tah a. 9 Chu hnung chun chu thlierkara mi dang natna nei taphot chu an hung a, an dam tah a. 10 Anni chun nasa takin an mi chawimawi a, kan inzinna pei dinga kan mamaw taphot khom longah an sie a.
Paulan Rom khuo a tlung
11 Chu thlierkara thlasik sung po châm tah Aleksandria khaw longa chun chuongin thla thum hnungah kan inthok suok nawk a. Chu long hming chu ‘Pathien Phîr’a a na, an pathien Kastor le Polluka lim a chuong a. 12 Surakus khuo kan tlung a, ni thum kan chăm a. 13 Chu taka inthok chun Rhegium kan tlung a. Ni khat hnungah sim thli a hung hrăng a, a zingah Puteoli khuo kan tlung a.b 14 Chu taka chun unauhai kan hmu a, an kuomah kâr khat châm dingin an mi thlo a. Chuong ang peia inzinin Rom khuo chu kan tlung tah a nih. 15 Rom khuoa unauhai chun kan chanchin an hriet charin ‘Appia Dawr’ le ‘Khuolbûk Pathum’ chen mi tuok dingin an hung a. Paulan anni a hmu chun lawmthu a hril a, a thla a muong phá sot a. 16 Rom khuoa kan lut chun Paula chu vêngtu sipai pakhat leh in hrana a um an phalpĕk a.
17 Ni thum hnunga chun Paulan chu taka Juda hotuhai chu a ko khawm a, an hung chun an kuomah, “Unauhai, ei mihai chung amanih le ei thlatuhai Dan thuah amanih ieng khom thaw suol ka nei naw sà khomin Jerusalemah an mi man a, Rom sorkar kutah an mi pĕk a. 18 Anni chun an mi dawp a, thina khop ieng khom ka thawsuol an hmu naw leiin mi’n suo an tum a. 19 Nisienlakhom, Judahaiin an kal tlat leiin Kaisar hmaa intlun lo thei loin an mi siem a; sienkhom hi hi ka chipuihai hĕkna dinga ka thaw a ni nawh. 20 Chuleiin, hmu le biek chêu nuomin ka ko khawm chêu a nih; Israelhai lo beisei hlak Mesia lei khan khaidiet ka bun a ni hi” a ta.
21 Anni chun, “Judai rama inthokin i chanchin hrilna lekha ieng khom kan hmu naw a, unauhai lai i chanchin a thra tieng amanih a se tieng amanih hril dingin tu khom an hung bok nawh. 22 Hi pawl hi hmun tinah miin an hrilsiet kan hriet a, chu thua chun i ngaidan khom hriet kan nuom” an ta.
23 Chuongchun, ni an ruot a, chu ni chun a umna inah mi tam takin an hung pan a, zingkara inthoka zăn chenin Pathien ram thu a hril a, Mosie Dan bu le zawlneihai lekhabua inthokin anni chu Isu chungchang thu inawitir tumin an lungril inhmin a tum a. 24 A threnin a thu hril chu an ring a, a threnin an ring naw a. 25 An thu a khuongruol ta naw leiin Paulan hi thu hi a hril zoin an trìn ta diel a. A thu hril chu, “Thlarau Thienghlimin zawlnei Isai baua ei thlatuhai kuoma a hril,
26 ‘Hi chihai lai hin fein hril rawh:
Ngaithla rop in ta, a ngaina hre si loin,
Hmu rop in ta, hmu fu si loin;
27 Hi chihai lungril hi a chawlol tah a,
An nà an suksĕt a,
An mit a’n insîm bok a;
Ni naw sien chu mitin hmung an ta,
Nain ngaithla’ng an ta,
Lungrila manin ngha kîr an ta,
Ka lo sukdam tawl awm si’
ti kha a lo hril indik ngot el.
28 Chuongchun, Pathien sandamna chu Jentelhai kuomah pĕk a nih ti hi lo hre ro. Anni chun ngai khom ngaithlang an tih” a ta. 29 Hi hi a hril zoin Judahai chu nasa taka insêlin an suok tawl tah a.
Thu khârna