“Felik inzaum tak, nangma zârin hun sawt tak keini lai muongna a’n lêng tah a, hmathlîr i nei thrat leiin kan ram khomin nasa takin a thrat pha a. 3 Felik inzaum tak, hmun tinrêngah kong tinrêngin i chungah kan lawm takzet a nih. 4 I ta dinga nghokum ni ka nuom naw a, sienkhom thu tlawmte ka hril ding hi lunginsiet taka mi ngaithlapêk hrăm dingin ka ngĕn che.

5 “Hi pa hi mi hnoksap tâwp el, hmun tina Judahai laia buoina chok suoktu le Nazaret pawla an thruoitu lû tak a nih ti kan hriet a, 6 Tempul khom sukporchĕ a tum leiin kan man a nih. 7 Kan dan angin a chungthu rĕl kan tum a, sienkhom sipai kawmandar Lusia a hung a, a mi lakluipek a, a hêktuhai chu i hmaa hung dingin thu a mi pêk bok a. ^a 8 Nangma ngeiin indon chǐk la, kan hĕkna san thudik chu amaa inthokin hre chieng thei i tih” a ta. 9 Judahai khomin a hĕknahai chu a’n dik vong tia thrangin an lo thlop a. 10 Larsâpin thu hril dinga Paula a hei mitmei charin, “Hi chihai rorêltuah kum tam tak i thrang tah leiin lawm takin ka thiem thu ka hril ding a nih. 11 Jerusalema Pathien chawibiek dinga ka hang fĕna hi ni sawmpahni băk a la ni nawh ti olsam takin indon chieng thei i tih. 12 Tempul amanih, sunagog amanih le khawpui khaw lai hmuna khom mi ka’n sĕlpui le buoina siem dinga mi ka’n fui por tu khomin an hriet nawh. 13 Tuta an mi hĕkna khom hi a san bulbal i kuomah hril ding hre naw ni hai. 14 Thil pakhat ka thaw ruok chu hi hi a nih: kan thlatuhai Pathien chu anni rawiin pawl hranga an ngai ‘Lampui’ zuitu ka nina angin ka chawibiek hlak. Dan thu le zawlneihai lekhabua ziek po po le inmilhai chu ka ring vong bok. 15 Anni ang bokin Pathienah beiseina ka nei a, mi fel le fel lohai an thonawk khom ka ring. 16 Chuleiin, ieng lai khomin Pathien le mihriem hmaa soisel kai lo sie le thra hrietna inthieng put ka tum hrâm hrâm hlak a nih.

17 “Kum tam tak ka thang hmang hnungin ka chipuihai ta dinga somdawlna thilpêk chawiin hlănbiekna thil inhlăn dingin Jerusalemah ka hang fe a. 18 Chuonga inthienna ser le sang ka thaw zo hnung chun Tempulah an mi hmu a, sienkhom pung khawm an um naw a, ieng buoinaa khom ka thrang bok nawh. 19 Asia rama inthoka hung Juda threnkhat an um ve a, chuonghai chun ka chungah thu poi an nei a ni chun hi taka hin hungin i hmaah hril raw hai se. 20 Chuong a ni si naw leh, hi taka hunghai hin Sanhedrin hmaa ka ngir lai khan iem ka thaw suol hril raw hai se; 21 an hmaa ka ngir laia, ‘Mithi thonawkna thuah voisun hin in hmaah hêkin ka um a ni hi’ ka ti kha a ni nghal si naw chun” a ta.

22 Felik chun Lampui thu chu a lo hriet ta hle a, “Sipai kawmandar Lusia a hung thlak pha i thu ngaituong ka tih” a ta, a thu chu a sie hri a. 23 Paula chu zalen takin a’n umtir a, a ruolhaiin a rong an bawlpek khom khap lo dingin sipai zahotu chu thu a pĕk a.

24 Ni iemani zat hnungah Felik chu a nuhmei Drusilla, Juda mi chu thruoiin a hung a, Paula chu a’n kotir a, Krista Isu ringna thu a hril chu a ngaithlak a. 25 Thiem inchangtirna thu dam, insûm theina thu dam, rorêlna a la um ding thu dam Paulan a hril lai chun Felik chun pangzatum a ti hle a. “Fe nawk ta la, hun remchang ka nei nawk hunah la hung inkotir ka ti che” a ta. 26 Paulan thamna a pĕk a beisei sa bok leiin a ko rop a, a biek hlak a.

27 Kum hni a’n voi hnungin Felik chu Porkia Festa-in a hung thlak a. Felik chun Judahai suklawm a nuom leiin Paula chu lung inah siein a fesan tah a nih.