Festa hmaah Paula a ngir
25
1 A biel a hung tlunga inthok ni thum hnungah Festa chu Kaisari-a inthokin Jerusalemah a hang inzin a. 2 Thiempu laltak le Judahai chun Paula le an thubuoi chu an lo hril a. 3 Paula chu Jerusalema hung inthruoitir dingin a ditsakna an lo ngĕn a, lampuiah lo lambuna that an tum a nih. 4 Festa chun, “Paula chu Kaisari lung inah a um zing a, kei khom ka fe thla nawk el ding a na, 5 thilsuol a thaw a ni chun in hotuhai laia mi a threnin mi zui thla hai sien, hêk raw hai se” a ta.6 Anni lai ni riet amani ni sawm amani a châm hnung chun Kaisari-ah a kir thla nawk a. A zinga chun rorêlna thrungphaah a thrung a, Paula chu hung thruoi dingin thu a pêk a. 7 A hung tlung chun Jerusalema inthoka hung Judahai chun an ngir huol a, thu rik tak takin an hĕk a, sienkhom an hĕkna chu a’n dik ti an hril chieng thei si nawh. 8 Paula chun a thiemthu a hril ve a, “Judahai Dan ka bawsiet naw a, Tempul ka sukporche naw a, Kaisar poi ieng khom ka hril bok nawh” a ta.
9 Festa chun Judahai lakah tlăktlum a nuom a, Paula kuoma chun, “Jerusalemah hang fe a, ka hmaa an hĕknahai che hi rĕlpêk i nuom am?” a ta.
10 Paula chun, “Tu hin Kaisar rorêlna thrungpha hmaah ka ngîr a, hi taka ngei hin rĕlpêk ka ni ding a nih. Judahai chungah ieng khom ka thaw suol nawh ti nangma ngeiin chieng takin i hriet. 11 Thil suol ka thaw a, thina khop meu thil ka thaw a ni chun thi khom ka sêl nawh. Amiruokchu, Judahai mi hêkna hi ieng khom lo a ni chun anni kuta mi’n hlan theina tu khomin an nei nawh. Ka thu hi Kaisar kuoma intlun ka ngĕn” a ta. 12 Festa chun a rorêlpuituhai a rawn hnungin, “Kaisar kuoma intlun i ngĕn a, Kaisar kuomah fe mol i tih” a ta.
Lal Agrippa hmaah Paula an thruoi
13 Ni iemani zat hnunga chun Lal Agrippaa le Berniki chu Festa lawmlutna chibai buk dingin Kaisari-ah an hung a, ni tam tak an chăm a. 14 Festa chun Paula chungchang thu chu Lal Agrippa a hril a, “Felik khan tâng pakhat a maksan a, 15 Jerusalema ka hang inzinin thiempu lalhai le upahaiin a chungchang thu an lo hril a, thiem naw inchangtir dingin an ngĕn a. 16 Kei chun an kuomah, ‘Mi tu khom ama hêktuhai leh inhmatona an insăl hmaa thiem naw inchangtir el chu Rom sorkar dan a ni nawh’ ka ta. 17 Anni rawi chu hi taka hin an hung thlăk a, a zinga chun rorêlna ka tran nghal a, ama chu hung thruoi dingin thu ka pêk a. 18 Ka ring ang hrimin a hêktuhai chun thu poia lăk tlâk ieng khom an hril ta mang si naw a. 19 Anni sakhaw thu le mi pakhat thi tah, Paulan a hring nawk nia a hril, Isu chungthua buoi mei mei an lo ni chau a. 20 Chuong ang thil sui suok chu ka thiem zawng khom niin ka hriet naw a. Chuleiin, Jerusalemah hang fe a, an thu chu rêlpek a nuom le nuom naw ka’n don a. 21 Paulan an thu chu Kaisar hmaa intlun a ngĕn leiin Kaisar kuoma ka thon hma po hi taka kol dingin thu ka pêk a nih” a ta.
22 Agrippa chun Festa kuomah, “Kei khom chu pa thu hril chu ngaithlâk ka nuom a nih” a ta. Festa chun, “Zingah i ngaithlak ding annawm” a ta. 23 A zinga chun Agrippa le Berniki chu ropui takin an hung a, thu hrilna inah an lut a, sipai lalhai le a khuoa mi poimawhai khom an thrang ve a. Festa thupêkin Paula chu an hung thruoi lŭt a.
24 Festa chun, “Lal Agrippa le hi taka hung po po hai, en ro, Jerusalem le Kaisaria um Juda mipui po poin hêk a, ‘Ama hi dam tlâk a ni nawh’ tia an khĕk khum pa chu ama hi a nih! 25 Thina khop suol a thaw ka hmu naw a, sienkhom Kaisar hmaa a thu intlun a ngĕn leiin Rom tieng thon dingin ka sukthlŭk tah a. 26 Amiruokchu, Laltak kuom meua hang intlun ding thu mumal ziek ding ieng khom ka hriet si naw a, chuleiin in hmaah ka hung thruoi suok a ni hih. Lal Agrippa, i hmaa ka hung thruoi a ni bîk deu tak a, thu ei indon hnunga iemani bĕk ziek ding ka nei thei tâkduoiin. 27 An hĕkna chieng taka ziek si loa Laltak kuoma tâng thon rikngot chu thil awmin ka hriet si naw a” a ta.