Makedonia le Grik ramah
20
1 Buoi a rè chun Paulan zirtirhai a ko khawm a, a’n fûi phŭr a, chibai buka a’n thla tawl hnungin Makedonia ram panin a suok a. 2 Chu ram chu a fang suok a, zirtirhai chu thu tam tak hrila nasa taka a chokphûr zo chun Grik ram a tlung a. 3 Chu taka thla thum a châm hnung chun, Suria ram pana longa a suok tawmin Judahaiin that tumin thu an phierruk ti a hriet leiin Makedonia ram sir kuola kǐr a tum ta lem a. 4 Beroi khaw mi Pura naupa Sopater hai, Thesolonika khaw mi Aristarka le Sekunda hai, Derbe khaw mi Gaia hai, Timothe hai, Asia biela mi Tukik le Trofim haiin an zui a. 5 Chuonghai chun hma an lo lăwk a. Troas khuoah an mi lo nghăk a. 6 Keini ruok chu chol thrang lo bei kŭt zo hnungin Filipi khuoa inthokin longin kan suok a, ni nga hnungah Troas kan tlung a, chu taka chun ni sari kan chăm a.Troas khuo a sir
7 Pathiennia zan bu fa tlâng dinga kan inkhawmin, a zînga suok a tum leiin an kuomah zănril chenin Paulan thu a hril a. 8 In sawng, kan inkhawmna pindana chun khawnvar tam tak a um a. 9 Tlangval pakhat, Eutuka an ti hi tukver bulah a thrung a, Paulan thu a hril sawt êm leiin a imu a suok a, a lo inlusu a, in sawng thumnaa inthok chun hnuoiah a tla thla a, thiin an lâk a. 10 Paula chu a tlân thla a, a baw a, a pom a, “Thlaphang naw ro, a la dam ie” a ta. 11 A kai tung nawk a, bei a khoi a, a fâk a, zing khawvar zakin thu a hril a, a fe suok tah a. 12 Tlangval chu damin in tieng an thruoi a, nasa takin an thla a muong a.
Mileto panin a suok
13 Keini ruok chu Aso khuo panin longin kan lo fe hmasa a, Paula chun kea hung a, Aso-a inthoka longa chuong chau dingin rem a mi ruotpui a. 14 Aso-a kan intuok nawk chun longah a hung chuong ve tah a, Mituleni khuo kan tlung a. 15 Chu taka inthok chun longin kan suok nawk a, a zîngah Kio thlierkar zawn kan tlung a, a zîng nawk chun Samo thlierkar kan fe pĕl a, a zîngah Mileto khuo kan tlung a. 16 Asia rama hun a hmang sawt nawna dingin Paula chun Efesi khuo chu sun pel a tum a, a thei phot chun Jerusalemah Pentikos Kût hmang hman dinga tlung a tum leiin a’n hmaw a nih.
Efesi upahai an thla tawpna
17 Miletoa inthok chun Efesi kohran upahai chu hung dingin a’n cha a. 18 An hung tlung chun an kuomah, “Asia ram ka hung sir hmasa tak nia inthoka in kuoma ka um sung poa ka um dan kha in hriet a. 19 Judahai phierrukna leia fiena rik tak phur zingin, thuhnuoirol tak le mitthli pumin Lalpa rong ka bawl hlak a ni kha. 20 In ta dinga trangkai dinga ka hriet rêng rĕng chu ieng khom intîm loin, vantlang lai le in tina hai ka zirtir hlak chêu kha. 21 Judahai le Jentelhai kuoma khom sima Pathien tieng ngha ding le ei Lalpa Isu ring dingin ka’n hriettir hlak chêu kha. 22 Tuhin, Thlarau Thienghlimin a mi tir tlat leiin Jerusalemah ka fe ding a na, chu taka chun ka chungah iem a hung tlung ding ka hriet nawh. 23 Lung in le harsatnahai chauin khaw tinah an mi hmuok ding thu Thlarau Thienghlimin a mi hril hlak ruok chu ka hriet. 24 Intlansiekna chu zo a, Lalpan rongbawlna sin a mi pêk, Pathien lunginsietna thu puongdarna sin chu ka hlen phot chun, ka hringna chu thlăkthlà tlâkah ka ruot nawh.
25 “Tu hin hre ro, nangni rawi, Pathien ram thu hrila ka’n vâk ka’n vâk hlakna hai hin ka hmêl in hmu nawk ta naw ding a nih ti ka hriet. 26 Chuleiin, voisun hin in rênga thisenah ka fihlima ti ka hril cheu a nih. 27 Pathien remruot dan po po ip nei loin ka hril vong ta chêu kha. 28 Pathien kohran, a thisena ama ta dinga a’n chawk chu chawm dingin nangni le in beramhai ta dingin fimkhur ro; Thlarau Thienghlimin an chunga hotu dingin a sie chêu a ni hi. 29 Ka fe hnungin satene kol tak tak nangni lai hung lŭt an ta, beramhai hlă naw ni hai ti ka hriet. 30 Nangni laia mi ngei khomin zirtirhai chu anni tieng inpakaitir dingin thu kâwi la hung rol an tih. 31 Chuleiin, invêng fimkhur ro; kum thum rau sŭn-zăn zomin mitthli le zil chêu ka ma nawh ti kha hre zing ro. 32 Tu hin, Pathien kuta le a lunginsietna thu-ah ka’n hlăn chêu a, chu thu chun a siem puitling thei chêu a, mi thienghlimhai lai rochan a’n neitir thei bok chêu a nih. 33 Tangkaruo, rangkachak le silfen tu tâ khom ka’n hnar ngai naw kha. 34 Ka kut ngei hin kei le ka ruolhai mamaw ka phùhrŭk hlak ti in hriet. 35 Chuong anga inrima thawin mi hrat nawhai ei thrangpui ding a nih ti kong iengkimah ka sukhmu hlak chêu kha; ei Lalpa ngeiin, ‘Lăk nêkin pĕkin lukhâwng a nei lem’ a ti kha hre zing ro” a ta.